Pisortaq: Meeqqat arlaannaannilluunniit nakkutigineqanngillat
Nuummi atuarfiit meeqqeriviillu matuneqarmata nalunaarutiginnittarnerit ikileriangaatsiarsimapput, tamannalu kommunimit ernumanartoqartinneqarpoq.
Kommuneqarfik Sermersuumi Meeqqanut Ilaqutariinnerullu Ingerlatsivimmi pisortaq Martha Lund Olsen nalunaaruteqartoqartannginnera pillugu mianersoqqusivoq. Illoqarfiit pingaarnersaanni qaammammut nalinginnaasumut sanilliullugu, qaammammi kingullermi nalunaarutigineqarsimasut 38 procentimik ikileriarsimapput.
Illoqarfiit pingaarnersaanni atuarfiit meeqqeriviillu martsip 18-ianiit apriilip 16-iata tungaanut matoqqatinneqarmata meeqqat angerlarsimaffimminni atugarliortut pillugit nalunaarutit 78-iusimapput.
Nuummi ullormut nalinginnaaasumik nalunaarutigineqartartut agguaqatigiissillugit 4,2-jusaraluarput, piffissamili siliani pineqartumi ullormut agguaqatigiissillugit 2,6-it nalunaarutigineqartarsimapput.
Pisortaq Martha Lund Olsen isumaqarpoq, meeqqat ilaqutariinni atugarliortuni najugaqartut pitsaanerungaatsiartumik atugaqalersimaerannik kisitsisit takutitsinngitsut.
- Meeqqat qanorpiaq ippat? Suummi tamarmik matoqqaneranni pissutsit pitsaanerulersimangaatsiarsimanavianngillat, taanna oqarpoq.
Pisortanut attaveqartoqarsimanngitsoq
Meeqqat pillugit nalunaarutit nalinginnaasumik meeqqerivinni atuarfinnilu sulisunit tiguneqartarput, qaammalli ataasingajalluinnaq suut tamarmik matoqqasimammata meeqqat qanoq innerannik nakkutiginnittoqarsimanngilaq, pisortaq oqarpoq.
- Meeqqanut angerlarsimafimminni atugarliornerpaanut atuarfimmiittarneq meeqqerivimmiittarnerlu toqqissisimatitsillunilu patajaattumik ingerlatitsisarpoq. Tassanerpiarlu tassa uagut pisortatut oqartussatut meeqqat qanoq atugaqarnerat nakkutigisisussaavarput, taanna oqarpoq.
Martha Lund Olsenip taamaammat ernummatigaa, meeqqanik atugarliortoqarnersoq suli paasineqanngitsunik.
- Meeqqat atuanngippata meeqqerivimmiinngippataluunniit, qanoq innersut naluavut, taanna oqarpoq.
Suli ikiorsiisoqarsinnaasoq
Pisortap erseqqissaatigaa, nalinginnaasumik katsorsarneqarnissamut neqeroorutit tamarmik suli atuuttut. Ilaqutariinnut sullissiviit inuusuttunullu siunnersuisarfiit sullinneqareersunut attqaveqartarput, aamma ingerlatsivimmi sulisut amerlanersaat allaffimmi angerlarsimaffimmiluunniit nalinginnaasumik suli sulipput.
Meeqqalli isumaginnittoqarfgimmi allattorsimaffimmiitinneqanngitsut, ikiorneqarnissamillu pisariaqartitsisut kommunimit imaaliinnaq nassaarineqarsinnaaneq ajorput, pisortaq nassuiaavoq.
- Nalunaaruteqartoqarsimanngippat qanoq iliuuseqarsinnaanngilagut, Martha Lund Olsen oqarpoq.
Påskikkut qaamgiummata ullut marluk ingerlanerinnaanni nalunaarutigineqartut 18-iusimapput. Kommuni tamaat eqqarsaatigalugu nalinginnaasumit amerlanerungaatsiartut. Pisortap oqaluttuaraa, nalunaarutiginnittut amerlanerpaartaat tassaasimasut angerlarsimaffimmi sanilerisat politiillu.