Pisortaq: Ikiorsiisoqartinnagu Pituffimmik attartornermut akiliuteqarnissaq siulliusariaqaraluarpoq

Amerikamiut aningaasatigut ikiorsiissuteqaratik Pituffimmi sakkutooqarfeqarnerminnut akiliuteqaqqittariaqaleraluarput, pisortaanerusimasoq oqarpoq.

Jørgen Huno Rasmussen Danmarkimi sanasut suliffeqarfissuanni, Hoffman og Sønner, siusinnerusukkut pisortaasimasoq, Namminersorlutik Oqartussat peqatigalugit ilaatisut Pituffimmi kiffartuussinissamik isumaqatigiissuteqarsimavoq.

Pisortaasimasup Altinget aqqutigalugu allaatigisaqarnermini oqaatigaa, USA-p Pituffimmi kiffartuussinissamik isumaqatigiissut kalaallit /danskit ingerlatseqatigiiffiutaanut tunniuteqqittariaqaraluaraa, taamaalillunilu sakkutooqarfimmik atuinerminut Kalaallit Nunaannut "inimik attartornerminut akiliuteqaqqittalerluni".

Tamanna ajornaanneruvoq, tapiissutaasinnaasunik nutaanik nassaarniarnermiit, Jørgen Huno Rasmussen, Carla Sandip sapaatip akunnerata kingulliup aallartilaarnerani Kalaallit Nunaannut ikiorsiissuteqarnissamik nalunaaruteqarnera qisuariarfigalugu naliliivoq.

Millioninik pingasunik kisitsisitalinnik tunniussisartut

- Susassaqartunut tamanut tamanna ajunngilluinnartumik ingerlasimavoq, ilaatigut Hoffmann & Sønnerikkunni, US Air Forcep Kangerlussuarmi Pituffimmilu sakkutooqarfeqarnerani isumaqatigiissuteqarsimasni pisortaagallarama, tamanna ilisimasaqarfigaara, Jørgen Huno Rasmussen Altinget aqqutigalugu allappoq, nangillunilu:

- Ukiorpassuarni Pituffimmi isumaqatigiissutip tamatuma, Kalaallit Nunaanni Namminersornerullutik Oqartussat danskit-kalaallit sanasuinut ilaasutut, ukiumut millioninik pingasunik kisitsisitalinnik isertitaqartittarsimavai.

Jørgen Huno Rasmussen naapertorlugu, USA-p 2014-imi isumaqatigiissut Exelis Services A/S-imut, Amerikami Vectrusimit pigineqartumut tunniukkamiuk, amerikamiut ineqarnermut akiliuteqartarunnaarsimapput.

USA-p isigineqarneranut iluaqutaassasoq

Exelisimik toqqaaneq Kalaallit Nunaanni Danmarkimilu isornartorsiorneqangaatsiarsimavoq, aamma Naalakkersuisut aaqqiissutissarsiorsimagaluarput, sulili manna tikillugu iluatsinneqanngittumik. Tamannali eqqortumik aqqutissaangaluarpoq, Jørgen Huno Rasmussen oqarpoq:

- USA ikiorsiissutissanik nutaanik neriorsuitinnani attartornermut pisussaaffimminik naammassinnissinnaasuuguni isigineqarneranut iluaqutaassangaluarpoq, taanna Altinget aqqutigalugu allappoq.

Powered by Labrador CMS