Pisortaqarfinni atorfillit amerliartuinnavissut
Namminersorlutik Oqartussani kommuninilu piffissaq tamakkerlugu suliffillit ukiut kingulliit tallimat ingerlaneranni 743-nik amerlanerulersimapput.
Nunami maani pisortat ingerlataqarfiini sulisut amerlavallaarnerat piffissap ingerlanerani oqallittartunit politikkerinillu sammineqarluartarsimavoq.
Tamannali ajornaatsuinnaanngitsot takutinneqartuartarsimalluni, Naatsorseqqissaartarfimmillu kisitsisit nutaat tamanna uppernarsarpaat.
Namminersorlutik Oqartussani kommuninilu piffissaq tamakkerlugu suliffillit 2020-mi 11.066-iusimasut 2021-mi 11.279-inngorsimapput - tassa suliffillit 213-inik 1,9 procentimilluunniit amerlisimapput.
Piffissamut kingusinnerusumut qiviaraanni taamatukanneq ingerlasoqarsimasoq takuneqarsinnaavoq. 2017-imi piffissaq tamakkerlugu suliffillit 10.536-usimapput, 2021-milu piffissaq tamakkerlugu suliffillit 743-nik amerlanerulersimallutik.
Najugaqarfinni suliffillit agguataarsimanera qiviaraanni takuneqarsinnaavoq, pisortaqarfinni suliffillit illoqarfiit pingaarnersaanni amerlanerpaasut.
- 2021-mi Nuummi piffissaq tamakkerlugu suliffillit 4.033-upput, taakkunannga 2.346-t Namminersorlutik Oqartussani atorfinitsinneqarsimapput 1.687-illu kommunimi atorfinitsinneqarsimallutik. Ittoqqortoormiini piffissaq tamakkerlugu sulisartut katillugit 82-iupput, taakkunannga 6-it Namminersorlutik Oqartussani 76-illu kommunimi, Naatsorsueqqissaartarfik allappoq.
