Pisortaq pillugu pinartut: Jens B. Frederiksen soraarsitaavoq
Kalaallit Nunatsinni inuussutissarsiortut akornanni nuimasupilussuaq illoqarfimmik piorsaanermut ingerlatseqatigiiffimmi Nuuk City Developmentimi pisortaaneq Jens B. Frederiksen soraarsinneqarpoq. Sooq taamaatinnerluni oqaaseqarfigiumanngilaa.
Nuuk City Developmentimi (NCD) siulersuisuni siulittaasoq Ole Jakobsen sisamanngornermi ualikkut tusagassiorfinnut naatsumik nalunaaruteqarluni ilisimattisivoq Siorarsiorfik - Nuuk City Developmentip siulersuisui aalajangersimasut pisortamut Jens B. Frederiksenimut aamma aningaasaqarnermut pisortaq pisortaanerullu tullianut Peter Christiansenimut suleqatiginninnertik taamaatissallugu.
Siulersuisuni siulittaasoq Ole Jakobsen maannakkuugallartoq siulersuisuni siulittaasutut sulisutut atorfinikkallarpoq, siulersuisullu pisumi annertunerusumik oqaaseqarumanatik.
Suliaq pillugu aviisi Sermitsiaq allaaserisaqarpoq. Aviisi ualimut nal. 17.30 nittartakkamut ikkunneqarumaarpoq.
Aviisimi allaaserisamit tigulaagaq:
Jens B. Frederiksen angutaavoq oqaaseqartorsuunngilaq illoqarfiit pingaarnersaata kommuniani illoqarfimmik piorsaanermut ingerlatseqatigiiffimmi Nuuk City Developmentimi NCD-mi pisortaanertut atorfini annaagamiuk.
Tusarfinnit arlaqartunit atiminnik taasinissaminnik kissaateqanngitsunit Sermitsiap paasissutissaatai naapertorlugit Jens B. Frederiksen Kommuneqarfik Sermersuumit illoqarfimmik piorsaanermut ingerlatseqatigiiffimmik piginnittumit soraarsitaavoq.
Aamma taamatut NCD-mi aningaasaqarnermut pisortaq pisortaanerullu tullia Peter Christiansen.
- (NCD-mi, aaqq.) suliunnaarpunga. Marlunngormat Sermitsiaq sianerluni tassangaannaq soraarnera pillugu aperimmat Jens B. Frederiksen taama oqarpoq.
- Sooq?
- Tamanna oqaaseqarfiginianngilara, oqarpoq.
Jens B. Frederiksenip uppernarsarpaa sapaatit akunnerani kingullermi taamaatilluni, taamaalillunilu Nuuk City Developmentimi 2017-imiilli ukiakkut siuttuuffigisaminit tunuarluni. Nuummi tusatsiakkat naapertorlugit pisortat marluk atorfimminniit peersinneqarput. Taamaalilluni illoqarfi mmik piorsaanermut ingerlatseqatigiiffiup qullersani marluk annaavai.
Atorfimmit peersinneqarneq ilimasaareqqaarani erngerluni soraarsitsineruvoq, nalinginnaasumillu erngerluni akissarsiat qaffasissut annaallugit. Peersitsinermut peqqutaasut ilungersunartupilussuusariaqarput.
Sapaatit akunnerata uumap qiteqqunnerani Jens B. Frederiksenip aamma Peter Christensenip NCD-p nittartagaanit pisortatut assingi takussaanngillat. Sulili immikkoortumi »sulisuni« takussaallutik.
Deloittemit isornartorsiuineq
Soorlu ungasinngitsukkut Sermitsiaq. AG-mi allaaserineqartutut Kommuneqarfik Sermersuup kommunillu illoqarfimmik piorsaanermut ingerlatseqatigiiffiata Nuuk City Developmentip akornanni pissutsit tukattupilussuupput.