Pisortaq naatsiiat iginneqartartut pillugit: Pitsaassusaannut pisisartut tatiginninngillat
Neqi A/S-ip nunatsinnit naatsiiat tunisat tamarmiusut affaasa missaanniittut ukiut tamaasa igittarpai. Kalaallit naatsiiataasa pitsaassusaannut tatiginninnerup pilerseqqinnissaanut ataatsimut annertuumik suliniuteqarnissamik pisariaqartitsivoq, pisortaq isumaqarpoq. Naalakkersuisoq periusissamik nutaamik nalunaaruteqarpoq.
- Nerisassanik eqqaasarneq pitsaanngisaannarpoq, annernarporlu.
Neqi A/S-imi pisortaq, Ole Vestergaard taama oqarpoq.
Nunatsinni naatsiiat tunineqartut tamarmiusut affaannit amerlanerusut ukiut tamaasa iginneqartarnerannik, paragraf 37 naapertorlugu akissummi saqqummiunneqarnerata kingorna taama oqaaseqarpoq. Naak naatsiiat ilaat tunineqanngitsut Neqip arfininngornikkut savaarartortitsisarneranut atatillugu aamma toqoraavimmi kantiinamik ingerlatsinermut atorneqartaraluartut, amerlanngitsuinnaat pineqarput.
Naatsiiat iginneqartut tonserpassuit
Neqi A/S 2020/2021-mi naatsiianik 80 tonsinik tunitsivigineqarpoq, taakkunannga 38 tonsit pisiniarfinnut tunineqarput. Tassa affaannit ikinnerujussuupput. 2021/2022-mi ingerlatseqatigiiffik 83 tonsinik tunitsiviuvoq, 29 tonsinillu tunisaqarluni.
2022/2023-mi aamma taamatut isikkoqarpoq, maannamut naatsiiat 72 tonsit tunitsivimmut tunineqarput, taakkunanngalu 12 tonsit tunineqarput.
Taamaakkaluartoq naatsiianik nutaamik tunisassiornissamut ineriartortitsinissamut pilersaaruteqartoqanngitsoq, Neqi A/S ilisimatitsivoq. Neqi A/S-ilu naatsiianik taama amerlatigisunik tunitsiviuinnassaaq, ingerlatseqatigiiffik Namminersorlutik Oqartussanut kiffartuussinissamik isumaqatigiissuteqaramik.
Naatsiiat iginneqartarnerat nutaarsiassaanngilaq. Inatsisartunut IA-mit ilaasortaq Mariane Paviasen aamma Stine Egede, Kommune Kujallermi borgmesteri, naatsiiat pillugit oqallitsitsipput, tamannalu nutaamik arlaannik kinguneqartinneqanngilaq.
Pisisartut tatiginninnginnerat
Naatsiiat amerlasoorpassuit igiinnarneqartarnerat unitsinneqassasoq, politikerit taakku isumaqarput. Soormiuna akit appartinneqaannarnianngitsut, ilaatigut taama aperipput.
Tamanna pillugu akit akit kisimik pineqanngitsut, pisortaq akissuteqarpoq.
Kalaallit naatsiiaataat 2019-imi tusaamanerlunneqalersimasut, Ole Vestergaardip nassuiarpaa, tassani naatsiiarpassuit qeqqanni qernertortaqarsimapput, taamaattumillu naatsiianit eqqussukkanit pitsaanerunatik.
- Pisiniarfinnut pisiniartartut taamaattumik naatsiiat pitsaassusaannut siornatigumut sanilliullugu assinganik tatiginninngillat.
Kalaallit naatsiiaataasa pitsaassusaannut tatiginnilersitseqqinniarluni annertuumik ataatsimoorussamik iliuuseqartoqarnissaanik pisariaqartitsisoqartoq, Neqi A/S-imi pisortaq isumaqarpoq.
Imminut pilersornermut periusissaq suliarineqarpoq
Mariane Paviasenip paragraf 37 naapertorlugu apeqquteqartup, Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfik isornartorsiorpaa.
Taanna allappoq:
- Maannalu piffissanngorluinnarpoq naalakkersuisoqarfiup ullutsinnut malunnaatilimmik suliaqarsimanermik takutitsinissaa naatsiaanarnulluunniit tunngagaluarpat.
Naalakkersuisoqarfik nerisassanik pilersuinerup pitsaanerulernissaanut pilersaaruteqarnersoq, Paviasenip paaserusuppaa.
Naalakkersuisut Kalaallit Nunaanni imminut pilersornissamut periusissiaq siulleq suliaralugu aallartikkaat, tassunga atatillugu naalakkersuisoq Kalistat Lund ilisimatitsivoq, taammailaatigut Kalaallit Nunaata inuussutissaqarnermi imminut pilersorneranik annertusititseqataassaaq.
Kalistat Lundip oqarnera naapertorlugu, periusissaq kalaallit tunisassiaannut piumasaqaatinut sinaakkutissanut pitsanngueqataassaaq, taamaalillunilu najukkani inuussutissiarineqartut inuiaqatigiinnut ajornannginnerusumik siaruarterneqarsinnaalissapput, assartorneqarsinnaalissapput tuniniarneqarsinnaalissallutillu.