Pisortaq itigartitsinermut assut pakatsisoq
Meeqqat angerlarsimaffiat nunaqarfimmi Kapisilinni marlunnik illuaraliorniarluni qinnuteqarmat, politikerit itigartitsigamik meeqqat pisariaqartitaat eqqarsaatiginngilaat, meeqqat angerlarsimaffianni pisortaq isumaqarpoq.
Meeqqat angerlarsimaffiat Sikkerneq nunaqarfimmi Nuup eqqaani Kapisilinni marlunnik illuaraliornissaminut itigartinneqarmat, meeqqat angerlarsimaffianni pisortap Lotte Østergaard Hastrupip uggoraa.
Najugaqartunit suliniummut akerliusorpassuunerannut innersuussillutik, kommunimi politikerit qinnuteqaammut itigartitsipput. Meeqqat angerlarsimaffiup avataanut inissinneqarsimasut nunaqarfimmi perulluliornissaat ernummatigaat.
Lotte Østergaard Hastrup aalajangiinermut isumaqataanngitsorujussuuvoq:
- Meeqqat pisariaqartitaat puigorneqarluni itigartitsisoqarmat pakatsisorujussuuvunga. Taakaniitilluta paaqqinnittarfittut meeqqat iluamik pissusilersornissaat nammineq inuttut uanga akisussaaffigisussaavara.
- Ukiorpassuarni Kapisilinni illuaqqanik attartortarpugut, tamannalu pillugu maalaaruteqarfigineqarnikuunngilagut, Lotte Østergaard Hastrup, Sermitsiaq.AG-mut oqarpoq.
Tunissutisiat illuaqqanut atorneqartussaagaluarput
Meeqqat angerlarsimaffiat ukioq manna annertuumik Starkimit 125.000 koruuninik tunineqarpoq. Tunissut illuaqqat sananeqarnissaannut akiliinermut iluaqutaasussaagaluarput.
Naak meeqqat angerlarsimaffiat illuaqqanik attartorsinnaagaluartoq, nammineq pigisarsinnaagaluaruni allannguutaassagaluarpoq:
- Meeqqat nammineq illuarartaarsinnaannginnerat uggornarpoq, illuaqqami nammineq malunnaateqarsinnaallutik. Tulluusimaarutigisinnaasaminnik eqqaamasanillu nuannersunik pilersitsiffigisinnaasaminnik, Lotte Østergaard Hastrup, Meeqqat angerlarsimaffianni Sikkernermi pisortaq, Sermitsiaq.AG-mut oqarpoq.
Nunaqarfinni aqutsisunut ilaasortaq: Najugaqartunut toqqissisimananngilaq
Politikeri Justus Hansen (D) meeqqat angerlarsimaffiannit qinnuteqaammut itigartitsisumut ataatsimiititami siuttuuvoq. Najugaqartunit akerliunerit pingaartinneqarsimasut, Sermitsiaq.AG-mut nassuiaavoq.
Ulloq unnuarlu paaqqinnittarfiit sisamat Kapisilinni illuaraqareermata, meeqqat angerlarsimaffiata qinnuteqaataa akerleralugu, Kapisilinni nunaqarfimmi aqutsisunut ilaasortaq Angutimmarik Hansen oqarpoq.
Meeqqat angerlarsimaffiup avataanut inissinneqarsimasut pinngortitamiillutillu nunaqarfimmi inuuneq misigisariaqarneranik kissaateqarneq paasisinnaallugu oqarpoq, kisianni meeqqat angerlarsimaffiup avataanut inissinneqartut, meeqqat inuusuttullu ataatsikkut nunaqarfimmiikkaangata ilaatigut ajornartorsiortitsisarnerarpai.
- Ilaatigut aserorterisoqarnikuuvoq. Najugaqartunut toqqissisimananngilaq, Angutimmarik Hansen oqarpoq.