Silagissumi Annette Bogø Lyberthimut pilluaqqusiniarlutik aamma ukiuni pingasuni kingullermi illumi pisortaasimasumut Nauja Biancomut inuulluaqqusiniarlutik Odensemi inuppassuit umiarsualivimmiipput.

Nauja Biancop taamaallaat ukiuni pingasuni Nordatlantisk Husimi Kalaallit Illuutaannilu pisortaanerminut inuttut pissuteqarnini isertuutinngilaa.

Misigissutsit angisuut

Soorunami oqalugiartoqarpoq, pisortanngortullu Annette Bogø Lyberthip oqalugiarnerit aallarnerpai. Pisortap tulliatut atorfeqarluni tikilluaqqusivoq, oqalugiarnerillu pisortatut naggaserpai.

Annette Bogø Lyberth suliassanut piareersimavoq. Ukiuni 14-ini illuni taakkunani marlunni kulturikkut suliaqartutut pisortallu tulliatut misilittagaqarpoq, Annette Bogø Lyberthip oqalugiarnermini ersarissumik killisimaarpoq.

- Tulluusimaaqaanga. Pitsaanerpaamik sulinissara neriorsuutigaara, atorfinnilu nutaami aallartinnissannut qilanaarpunga, ilaatigut taama oqarpoq.

Nordatlantisk Husimi siulersuisunut siulittaasoq, Claus Houden, aamma oqalugiarpoq, aamma Kalaallit Illuutaanni siulittaasoq, Benny Nybo, soorunami aamma pisortaajunnaartoq Nauja Bianco, ilaatigut ima oqarpoq:

- Siunissami sulerissanerlunga naluara. Arlaatigut Kalaallit Nunaannut, Atlantikup Avannaanut, aamma Issittumut tunngasunik suliaqarnissara neriuutigaara.

Eqitaarinninnerit tunissuteqarnerillu aamma pipput.

Pisortaasimasut najuuttut

Nordatlantisk Husimi ilasseqatigiinnerit saqqummersitsisarnerillu kaffisortitsisarnernut ineriartorsimapput, inuit illunut attuumassuteqartut aggerlutik, oqalugiarnernut tusarnaarlutik oqaloqatigiittarlutik.

Marlunngornermi ualikkut assersuutigalugu ukiorpassuarni illuni aqutsisuusimasut Finn Illum Jørgensen, Kirsten Mærsk aamma Nauja Bianco aamma Annette Bogø Lyberth pisumi najuupput.

Odensemi Kalaallit Illuutaat Region Syddanmarkimiippoq, tassani kalaallit 4.000-t najugaqarput.