Pisortani atorfinittut amerliartuinnartut
Ukiumiit ukiumut pisortani atorfillit amerlassusaat qaffattarpoq, naatsorsuinerup nutaap tamanna takutippaa.
Pisortani allaffissornerup annikillisinneqarnissaa oqallisaagaluaqisoq, sulisut aamma piffissami tamakkiisumi sulisut uuttortarnerisigut amerliartuinnarput.
Naatsorsueqqissaartarfimmit naatsorsuinerup nutaap tamanna takutippaa.
Pisortani sulisut piffissami tamakkiisumi sulisut 10.699-iupput, tassani Namminersorlutik Oqartussat 4.018-inik piffissami tamakkiisumi sulisoqartoq, kommunillu 6.681-inik.
Naatsorsuinerit
Piffissami tamakkiisumi sulisut:
- 2015: 10.171
- 2016: 10.254
- 2017: 10.536
- 2018: 10.699
Sulisut amerlassusaat:
- 2015: 18.161
- 2016: 18.251
- 2017: 18.428
- 2018: 18.517
2018-imi katillugit 18.517-t piffissami sivikinnerusumi sivisunerusumiluunniit Namminersorlutik Oqartussani kommuninilu sulisimapput. Sulisoq naatsorsuutini ilanngunneqarpoq qaammammi ataasiinnarmi, kvartalimi imaluunniit ukioq naallugu sulisimanera apeqqutaatinnagu, Naatsorsueqqissaartarfik nalunaaruteqarpoq.
Sulisoq piffissami naatsorsuiffiusumi atorfinni assigiinngitsuni arlalinni atorfeqarsimasinnaavoq. Taamatuttaaq sulisunut tamanut naatsorsuutini inuit amerlassusaat suliaqarfinnut ataasiakkaanut agguataarinermut naatsorsuutinut naleqqiullugit ikinnerupput. Sulisut amerlassusaannut naatsorsuutit atorfimmi piffissamik qanoq annertutigisumik atuisimanermut attuumassuteqanngilaq, tamanna piffissaq tamakkerlugu sulisuunermut naatsorsorneqarpoq.
Tjenestemandit ikinnerusut
Paasissutissani nutaani aamma atuarneqarsinnaavoq tjenestemanditut assigisaanilluunniit isumaqatigiissutit malillugit atorfinitsinneqarsimasut ukiumut siulianut sanilliullugit ikileriarsimapput. 2018-imi ikileriaat 2017-imut sanilliullugu piffissaq tamakkerlugu sulisartunik 48-nik amerlassuseqarpoq.