Pisortaanerusimasut politiinut unnerluutigineqarsimasut soraarnerminni miliuuninik ajunngitsorsiassaqartinneqarsimapput
Kommuneqarfik Sermersuumi pisortaanerusimasut politiinut unnerluutigineqarsimasut kommunimit soraarnerminni tamarmik immikkut en million koruunit sinnerlugit ajunngitsorsiaasaqartinneqarsimapput.
Kommunimit pisortaanerusimasut marluk Lars Møller-Sørensen aamma Hans Henrik Winther Johansen piginnaatitaaffimminnik unioqqutitsisimasutut politiinut unnerluutigineqarsimagaluarlutik, Kommuneqarfik Sermersuumi suliunnaarnerminnut atatillugu pitsaalluinnartunik ajunngitsorsiassaqartinneqarsimapput.
Tusagassiorfiup Sermitsiaq.AG-p pappialaatinik takunnissimanerata tamanna takutippaa.
Kommunimi pisortaanerusimasoq Lars Møller-Sørensen 1.381.228,56 koruuninik kiisalu soraarnerussutisiassanik 90.250,08 koruuninik pissarsisimavoq. PIsortaanerusimasullu aamma it-mi atortuutiminik tigummiaannarsinnaatinneqarsimalluni.
Sanaartornermi pisortaanerusimasoq Hans Henrik Winther Johansen qaammatini aqqanilinni aningaasarsiaqaannarnissamik soraarnerussutisiaqarnissamullu isumaqatigiissuteqarsimavoq. Isumaqatigiissummi aningaasat katillugit 1.029.691,19 koruuninik naleqarput.
Pisortaanerusimasut taakku marluullutik 2021-mi juunip naanerani aamma juuli aallartinnerani kommunimi suliunnaarput.
Ukioq taanna kingusinnerusukkut novembarip qaammataani Sermitsiaq.AG-mit saqqummiunneqarpoq, pisortaanerusimasut piginnaatitaaffimminnik unioqqutitsisimasutut politiinut unnerluutigineqarsimasut. Taakku marluullutik unnerluussutigineqartunut pinngitsuunerarsimapput.
Pisortaanerusimasut taakku marluullutik aamma Kommuneqarfik Sermersuumi inissaqartitsiniarlugni suliaasimasup kukkunersiorlugu misissuiffigineqarnerani qitiusutut inissisimasut ilagisimavaat.
Ingerlatsisimanermik kukkunersiuinermi pisortaanerusimasut taakku marluk isornartorsiorneqangaatsiarsimapput, maannalu Kommuneqarfik Sermersuumi suliassaqarfimmik torersaasoqaleruttorluni.