Pisortaanerusimasup kannguttaatsuliortarsimaneq pillugu suliareqqitassanngortitsini taamaatiinnarpaa

Peter Grønvold Samuelsenip suliaq nunatta eqqartuussiviani suliariteqqinnianngilaa. Eqqartuussiussaatitaasup suliareqqitassanngortitsinini aamma taamaatiinnarpaa, taamaammallu eqqartuussiviup aalajajngiinera atuulluni.

Peter Grønvold Samuelsen innarliisimanani suli isumaqarpoq, suliamili arnat allatut isumaqarnerat akuersaarpaa, illersuisua oqaluttuarpoq.

KNI-mi pisortaanerusimasup Peter Grønvold Samuelsenip eqqartuussaanera naatsorsuutigisamit siusinnerusukkut naammassineqarpoqt.

Pisortaanerusimasummi Nunatta Eqqartuussivianut suliareqqitassanngortitani taamaatiinnarsimagaa, illersuisua Finn Meinel ilisimatitsivoq.

Peter Grønvold Samuelsen ukioq manna apriilip 19-iani qaammatini pingasuni pineqaatissinneqarsimasut inissiisarfianiititassanngorlugu pineqaatissinneqarpoq, KNI-mi pisortaanerunermini arnanut arfinilinnut kannguttaatsuliortarsimasutut pisuutinneqarami.

Peter Grønvold Samuelsen pineqaatissinneqarsimasut inissiisarfianiittussatut pineqaatissinneqarnermi saniatigut arnanut kannguttaatsuliorfigisimasaminut tamanut5.00 koruuninik akiliiisussanngortinneqarsimavoq. Apriilimilu eqqartuussut atuuttussanngorpoq.

- Suliaq piffissami sivisuumi ingerlanneqarsimasoq

Finn Meinel naapertorlugu, Peter Grønvold Samuelsen imminut arnallu pineqartut eqqarsaatigalugit taamatut aalajangersimavoq.

- Peter Grønvold Samuelsen innarliisimanani suli isumaqarpoq, suliamili arnat allatut isumaqarnerat akuersaarpaa.

- Suliaq piffissami sivisuumi ingerlanneqarsimavoq, taamalu imminerminut arnanullu pineqartunut annertuumik artukkiisimalluni. Taamaammat eqqartuussiviup aalajangigaa isumaqatiginngikkaluarlugu akueriniarlugu aalajangersimavoq, Finn Meinel Sermitsiaq.AG-mut oqarpoq.

Illersuisup sulia suliareqqitassanngortimmagu unnerluussisussaatitaasup aamma suliaq suliareqqitassanngortissimavaa. Suliareqqitassanngortitsinerli taamaatiinnarneqarsimasoq, Finn Meinel oqaluttuarpoq.

Suliaq suliariteqqikkusussimagaluaraa

Finn Meinelip Sermitsiaq.AG-mut oqaatigaa, suliap nunatta eqqartuussiviani suliareqqinneqarnissaa kissaatigisimagaluarlugu.

- Isumaqarpunga eqqartuussivimmit tunngavilersuutigisimasavut isummerfigineqarsimanngitsut.

- Misilikkusussimagaluarpara, Peter Grønvold Samuelsenili suliaq unitsissagipput aalajangersimavoq, Finn Meinel oqarpoq.

Powered by Labrador CMS