Pisortaaneq: Royal Greenland aningaaseriviunngilaq
Royal Greenland sineriammut qanittumi aalisarluartunut taamaallaat killilimmik aningaasaliissuteqartarniarpoq, ingerlatseqatigiiffimmi pisortaaneq Mikael Thinghuus erseqqissaavoq. Royal Greenland aningaaseriviunani aalisakkeriviuvoq, taanna oqarpoq
Grønlandsbanki ataasinngormat umiatsiaararsorlutik aalisartunut aningaasaliissuteqartarnermik unitsitsigami oqallinnersuarmik pilersitsivoq. Aalajangerneq sisamanngormat allanngortinneqarpoq, umiatsiaararsorlutik aalisartut aningaasaqarnermikkut ajunngitsumik atugaqartut suli taarsigassarsisinnaasut bankip oqaatigimmagu.
Royal Greenland umiatsiaararsorlutik aalisartunut qangali taarsigassarsisitsisarsimavoq, tamannali killilimmik pisarpoq.
Mikael Thinghuus ingerlatseqatigiiffiup taarsigassarsisitsisarneranut imatut oqaaseqarpoq:
- Sinerissap qanittuani aalisartut siunissami aamma suleqatiginiarpavut, aamma killilimmik aningaasaliiffisisarniarpavut, RG-li aningaaseriviunani aalisakkeriviuoq, siunissamilu taamaattuartussaalluni.
Nungusaataanngitsumik ingerlatsineq
Taassuma Sermitsiaq.AG-mut erseqqissaatigaa, Royal Greenland isumaqartoq aalisarnerit tamarmik nungusaataanngitsumik ingerlanneqartariaqartut.
- Pisassiissutit biologit inassuteqaataat malillugit aalajangersarneqartariaqarput. Biologit inassuteqaataat isumaqatigineqanngippata, uagut aamma taakkununnga isumaqataanngissinnaasarpugut, taakku paasissutissaataat najoqqutarisartagaallu oqaloqatigiissutigineqartassapput, taamaalillutik aaqqiissuteqarfigisinnaammassuk, taamalu inassuteqaataat malillugit pisassiissuteqartalerluni, Mikael Thinghuus nassuiaavoq.
Mikael Thinghuusip erseqqissaatigaa, sinerissamut qanittumi aalisarneq pillugu oqallinneq uumassusilinnik nungusaataanngitsumik ingerlatsinissamut tunngassuteqanngitsoq, ”aalisakkammi pineqartut ilisimaneqartutut maani suffineq ajormata”.
Nalikilliartortut
- Akerlianik aningaasaqarnikkut imminut napatissinnaaneq pineqarneruvoq, Mikael Thinghuus erseqqissaavoq, nangillugni imatut mianersoqqusilluni:
- Ukiulli tamaasa qalerallit mikinerit aalisartarutsigit - ajoraluartumillu taamaattoqarnera assortorneqarsinnaanngilaq - aalisartunut, aalisakkerivimmi sulisunut nunamullu tamarmut sunniuteqartussamik aalisakkat nalikilliartortissavavut.
Royal Greenlandimi pisortaaneq naapertorlugu, sineriammut qanittumi umiatsiaararsorlutik qaleralinniartartut immikkut pisasssinneqartarnissaat aqqutissaavoq.
- Tamatuma - aalisariutit assigalugit - killilerujussuarmik pisassiissutinik pigisaqartitsisarnikkut, piginnittut siammartertuarneqarnissaannik politikkikkut kissaateqarneq iluaqusersinnaavaa, Mikael Thinghuus erseqqissaavoq.