Pisortaaneq: Allakkerisarneq allanngortinneqassaaq
Tele-Postip internetsikkut pisiniartoqarnerusalersimanera amerlanerusunik aningaasarsiorfissatut periarfissaqarsoraa, aamma internetsikkut pisiniarfinni pisiaasimasunik sullitaminnut ingerlatitseqqinnerusarusuppoq.
Allakkerisarneq Tele-Postip ullumikkut niunerminni tunngaviata 12 procentiinaringaluaraa, piffissami aggersumi aamma ukiunut sisanut periusissiamini poortukkerisarneq annertusarlugulu nutarterniarpaa.
- Allakkerisarnitsigut suliarisartakkavut ukiuni kingullerni ti procentimik annikilleriarsimapput. Ukioq manna allakkat isumagisimasavut ukiunut siuliinut sanilliullugit ikileriarsimapput, pisortatut oqartussat digitalikkut allakkanik tunniussinerusalernerat pissutigalugu, Tele-Postimi pisortaaneq Kristian Reinert Davidsen Sermitsiaq.AG-mut ilisimatitsivoq.
Pisortaanerup assersuutigalugu oqaatigaa, Akileraartarnermut Aqutsisoqarfik ukioq manna nammineerluni nalunaarsugassanik digitalikkut nassiussuisimasoq, innuttaasut e-boks aqqutigalugu pissarsiarisinnaasaannik. Tassa niuernermi atortorissaarutitigut ineriartortoqarneratigut niuernernermi ingerlatsisarnerup aappaanut tunngaviusoq mangiarneqarpoq.
Poortukkat amerleriangaatsiarsimasut
Digitalikkut ineriartortoqarnerata malitsigisaanik allanik suliassaqarnerusoqalersimavoq, tassa internetsikkut pisiniarartut ukiumiit ukiumut amerliartorsimagamik, tassani ukioq 2020 coronap allakkerisarnermut immikkut sunniuteqarsimanera eqqaassanngikkaanni.
-Ukiuni kingullerni internetsikkut pisiniartoqartarnera pissutigalugu poortukkatigut nassiussat amerleriarsimapput. 2020-mili tamanna otte procentimik annikilleriarsimavoq, Tele-Postimi pisortaaneq nassuiaavoq.
Niuernissinni pissarsiarisartakkasi poortukkerisartutut namminersortunut annaasimavisigit?
- Tamanna naaggaarsinnaanngilara. Tamannami oqaatigiuminaappoq, taamaattoq 2020-mi Kinamiit nassiussat ikinnerulersimapput, tassa corona pissutaalluni, Kristian Reinert Davidsen ilisimatitsivoq.
Tele-Postimit qanittukkut ilisimatitsissutigineqarpoq, ukiorpassuarni allakkerinermi pisortaasimasoq Per Svendsen suliffeqarfimmi suliunnaartoq. Allakkerinermi pisortassap nutaap suliassarissavaa, poortukkerisarnerup tamarmiusup allanngortinneqarnissaa.
Allangortitsinissaaq
- Poortukkerisarneq tamaat allanngortissavarput, tassa digitalikkut aaqqiissuteqarnerusoqartalissaaq. Aamma qulakkiissavarput, sullitatta poortukkanik aallernerminni tulleriaattannginnissaaq, Tele-Postimi pisortaaneq assersuusiorpoq.
- Poortukkerisarnitta tamarmiusup ilippanaateqarluarnera takusinnaavara. Namminersortulli niuerfiannik ingerlatsilernissaq anguniagaanngilaq. Assartuisarnissamik pisariaqartitsineq annertooruummat tamatta poortukkanik nassiussuisinnaavugut. Aap kaagi avitassarput alliartuinnarpoq, tassungalu atatillugu pingaaruteqarpoq uagut allakkerisutut suliassamik isumaginnissinnaanerput aamma pitsaalluinnartumik pilersaarusiorsinnaanerput, Kristian Reinert Davidsen erseqqissaavoq.