Pisortaaneq: Akissarsiakka tamanit ilisimaneqarnerat ajorinngilara

Kristian Reinert Davidsen siulersuisunit sulitinneqarpoq pisortaanertullu akissarsiaanut tunngasut tamarluinnaasa paasissutissiarisimavaat. Tamannalu ajorinngilluinnaraa paasinarsivoq.

- Akissarsiannut tunngasut tamanit takuneqarsinnaanerat ajorinngilara, taanna 2017-imi ukiumut naatsorsuutini 3,4 millioner koruunit missarluinnaanik akissarsitinneqarsimasoq allassimavoq, taamaalilluni Namminersorlutik Oqartussat suliffeqarfiutaanni isertitaqarnerpaat pingajuattut inissilluni. Taanna Royal Greenland A/S-imi aamma KNI A/S-imi pisortaanernit taamaallaat appasinneruvoq.

Immikkut pisussaaffiliineq

- Uanga isiginnittaasinni immikkut piumasaqaateqariaqarpoq, tassa aqutsisut aningaasarsiaasa paasissutissiarinissaat ingammik Namminersorlutik Oqartussat ingerlatseqatigiiffiutaat pineqartillugit, Kristian Reinert Davidsen Sermitsiaq.AG-mut nassuiaavoq.

Taanna isumaqarpoq, taamaaliornikkut inuiaqatigiit akornanni tusatsiakkanik pilersitsisarnerannik aaqqiissutaasinnaasoq.

Savalimmiormiup akissarsiaasa saniatigut suliunnaarnissaanut- tunuarnissaanullu aalajangersakkat aamma allanneqarsimapput.

Ersarilluinnartoq

Namminersorlutik Oqartussat ingerlatseqatigiiffianut Sikuki Nuuk Harbour-imut sanillersuullugu arlaannaanilluunniit isertuussisoqanngilaq.

Naatsorsuutini kingullerni aqutsisut akissarsiaat paasissutissiarineqarsimanngillat. Aqutsisoq ataasiinnaavoq: pisortaaneq John Rasmussen. Saqqummiuneqaruttorli ataaseq ima oqaasertalerneqarpoq:

- Aqutsisut atorfeqarnermut isumaqatigiissutaannik ajunngitsorsiassanik arlaatigulluunniit iluanaarutissaannik imaqanngilaq. Siulersuisut nalilerpaat, aqutsisut akissarsiaat atorfeqarnermullu atugaat ullutsinnut naleqquttoq.