Pisortaaneq Qaqortoq pillugu: Angissusissaa atuuffissaalu allanngortinnianngilavut

Kalaallit Airportsimit (KAIR) sapaatip-akunnerani matumani saqqummiunneqarpoq, Qaqortumi timmisartoqarfissap illutassaanik sanaartornissamut ingerlatseqatigiiffik isumaqatigiissuteqarsimasoq.

Tassunga atatillugu MT Højgaard suleqatigineqalersimavoq, sanaartornissarlu pillugu kingusinnerusukkut isumaqatigiissusiornissaq siunniunneqarsimalluni.

KAIR-imi pisortaanerup Jens R. Lauridsenip Sermitsiaq.AG-mut itisiliilluni oqaatigaa, piffissami sivisuumi suliariumannittussarsiuussisoqareersoq, maanna MT Højgaard neqerooruteqarsimasunit kisinngorussimasoq suleqatigiinnissamik isumaqatigiissuteqarfigineqarsimasoq.

Suliariumannittussarsiuussinerli isumaqatigiissummik atsiornermik kinguneqarsimanngilaq, suleqatigiinnissamillu isumaqatigiissummi siunniunneqarsimavoq isumagisassat naammassineqassasut, sanaartorneq missingersuusiarineqarsimasut iluini aallartinneqarniassammat.

Immikkuualuttunik allannguisinnaaneq apeqqutaasoq

Illutassap angissusissaa, ilulissaa atuuffissaalu allanngortinneqarnianngitsut, pisortaaneq oqarpoq:

- Ilaatigut sanaartornermi atortussat akiisa qaffakkiartornerat pissutigalugu suleqatigiinnissamik isumaqatigiissuteqarsimavugut. Missingersuusiarineqarsimasut tatineqarmata.

- Illutassap angissusissaa, ilulissaa atuuffissaaluunniit allanngortinneqassanngillat. Ilaatigut sanaartornermi atortussanik toqqaaniarnermi immikkuualuttut assigiinngitsut allanngortinneqarsinnaanerat apeqqutaavoq, Jens R. Lauridsen oqarpoq.

Qaqortumi Timmisartoqarfiliornissamut missingersuusiarineqarsimasut siorna ilaneqartput, suliniut aallaqqaammut naatsorsuutigineqarsimasumit akisunerusussaasoq paasineqarmat. 2022-mut aningaasanut inatsissatut siunnersuummi atuarneqarsinnaavoq, politikkerit mittarfissap 1.500 meteriunissaanik aalajangiussisimanerannut atatillugu 462 millioner koruunit pisariaqartinneqartut.

- Anguniagaq erseqqissoq

Apeqqut: Maanna missingersuutit iluini suliaqarsinnaavisi?

- Tasmanna MT Højgaardimut oqaloqatigiissutigisimavarput, aningaasallu atugassiissutigineqartut iluini anguniagarput angusinnaalluarparput.

- Erserqqissumik anguniagaraarput missingersuutit iluini suliassat naammassineqarnissaat, Jens R. Laurdsen oqarpoq.

Qaqortumi suliniut inuiaqatigiit aningaasaqarnerat eqqarsaatigalugu sinneqartoortitsisartussaanngilaq, taamaammat Naalakkersuisut suliassap akilerneqarnissaanut aningaasanik taarsigassarsiniarsinnaanngillat. Sanaartornermilu missingersuusiarineqarsimasut sipporneqassappata Nunatta Karsianit aningaasaliisoqartariaqarluni.

Taamaammat timmisartoqarfik Nuummi Ilulissanilu timmisartoqarfinnit immikkoortillugu sanaartorneqarlunilu ingerlanneqartussaavoq. Qaqortumi Timmisartoqarfissaq Kalaallit Airports Domestic-mit isumagineqassaaq.