Sinniisoqarfimmi pisortaq nutaaq

Pisortaaneq nutaaq assortuussutigaat

Atorfinitsitsinermut Ataatsimiititaliami amerlanerussuteqartut Aviäja Helms Kalaallit Nunaata Danmarkimi Sinniisoqarfiani pisortassatut nutaatut inassutigaat. Ikinnerussuteqartut akerliupput: Helmsip inuttassarsiuussinermi suliassatigut piginnaasanut piumasaqaatit naammassinngilai.

Svend Hardenberg, Siulittaasup Naalakkersuisoqarfiani pisortaq aamma atorfinitsitsinermut ataatsimiititaliami, Københavnimi Kalaallit Nunaata Sinniisoqarfiani pisortaanermik pissarsiniartussami, siulittaasoq.

Atorfinitsitsinermut Ataatsimiititalimi tallimanik inuttalimmi, Danmarkimi Kalaallit Nunaata Sinniisoqarfiani ukiuni arlalinni pisortaanerusimasup Tove Søvndahl Petersenip taartissaanik ujaasisumi, isumaqatigiinngitsoqartorujussuuvoq.

Ima avissaartuutsigaat ataatsimiititaliap isumaqatigiinnissani taamaatiinnarsimallugu.

Taarsiullugu amerlanerussuteqartut inassuteqaataannik Naalakkersuisut siulittaasuannut Aleqa Hammondimut allagaqartoqarpoq. Tassani atorfinitsitsinermut ataatsimiititaliami amerlanerussuteqartut, ilaatigut Siulittaasup Naalakkersuisoqarfiani pisortap Svend Hardenbergip aamma tassani ipsortap Mininnguaq Kleistip sinniisoqarfimmi pisortassatut tikkuarpaat eqqartuussissuserisoq 56-inik ukiulik Aviâja Helms.

Aleqa Hammondip oqaaseqarfigiumanngilaa

– Sulisoqarnermut tunngasuuvoq. Taamaattumik oqaaseqarfigisinnaanngilara, Aleqa Hammond oqarpoq, ilanngullugulu oqaatigiumanngilaa inassuteqaat Naalakkersuisunit akuerineqareersimanersoq, tassa Naalakkersuisut qaffasissumik atorfinitsitsinermi akulerutinneqartassammata. Tusakkat malillugit Aviâja Helms oktobarip aallaqqaataani atorfimminut nutaamut ikkutissaaq, taamaattumik aalajangiisoqangajalerunarpoq, Naalakkersuisuni aalajangiisoqareersimanngippat.

Aviâja Helms ulllumikkut kisimiilluni Nuummi eqqartuussissuserisutut ingerlatsivimmik ingerlatsivoq, uigaalu ilisimaneqarnerusoq Hans Jakob Helms, taannalu ukiuni arlalissuarni Siumumi politikerinut Lars-Emil Johansenimut kingullermillu Doris Jakobsenimut folketingimi allattaasimavoq.

Piumasaqaaatit qaffasissut arlallit

AG-p paasisai malillugit atorfinitsitsinermut ataatsimiititaliami isumaqatigiinngissuteqarnermut pissutaavoq ilaasortat arlallit aalajangiusimammassuk Aviâja Helmsip suliatigut piginnaasat, Namminersorlutik Oqartussat inuttassarsiuussinermi piumasaqaataat, naammassisimanngimmagit.

Tassuuna ujartorneqarpoq inuk "aqutsinermik sivikinnerpaamik ukiunik pingasuniit tallimanut misilittagalik aammalu politikkikkut aalajangiiniartarnerni pisortallu allattoqarfianni sulinermik ukiut tallimat sinnerlugit misilittagalik". Sinniisoqarfimmi pisortanngortussaq aamma "ingerlatsivimmi politikkikkut ingerlanneqartumi sulinermik misilittagaqarluassaaq" aammalu "missingersuutit malillugit aqutsinermik misilittagaqassalluni ataavartumillu aningaasatigut malitseqartitsillunilu nalunaarusiortassalluni". Kiisalu "pisortatut misissuinermillu piginnaasaqarluassalluni"

Piumasaqaatit Aviâja Helmsip naammassinngisai, allanillu naleqqunnerusunillu peqarsimagunarluni. Atorfinitsitsinermut Ataatsimiititaliami ilaasortat akerliusut eqqartuussussuserisoq akueriumanngilaat, taamalu inuk atorfimmut qaffasissumut piumasaqarfiusumut inuttassarsiuussinermi piumasaqaatinik tunngavissanillu pisariaqartunik naammassinninngitsoq atorfinitsikkumanagu. Atorfiullu imarai sinniisoqarfimmi sulisunik aqutsineq, nunat allamiut diplomatiinik pingaaruteqaleraluttuinnartunik attaveqarneq kiisalu allaffissornikkut suliassat arlallit. Akerlianik akissarsiarissaartuussaaq, ukiumut 859.596,24 koruuninik.

Oqaaseqarumanngilaq

Aleqa Hammond siusinnerusukkut isornartorsiorneqartarsimavoq ikinngutigilluakkanik parteeqatinillu pisortani atorfinnut atorfinitsitsisartutut. Ajornartorsiutaqanngitsoornerli ajorput. Assersuutigalugu Inatsisartuni Siumup gruppiani isasooraluttuinnartumi sakkortuumik isornartorsiorneqarpoq Aleqa Hammondip aappaa naalakkersuisunut ilaasortap allattaatut atorfinitsinneqarmat. Atorfinitsitsineq tamanna tatineqarnerujussuarmi kingorna Siumup siulittaasuata tunuartippaa. Atorfinitsitsigaluarneq tamanna pissutigalugu Siumukkormiutoqaq Hans Enoksen partiimit anivoq.

Sinniisoqarfimmi pisortatut atorfimmut akissarsiarissaarluinnartumut qinnuteqartut 19-iusimapput, piukkussallu sisamat oqaloqatigineqarsimapput, ilaatigut arlallit ukiuni arlalinni allaffimmi pisortatut misilittagallit, tamanna Sermitsiaq.AG-p paasivaa, atorfinitsitsitsinermullu ataatsimiititaliap siulittaasua, naalakkersuisoqarfimmi pisortaq Svend Hardenberg oqaaseqartinniarsimagaluarparput.

Taannali oqaaseqarumanngilaq, Aviâja Helmsimik atorfinitsitsineq - imaluunniit atorfinitsitsinissaq - Namminersorlutik Oqartussat intranettianni oqaatigineqareersimagaluartoq nassuarneqareersimagaluartorlu - sulisumut tunngagaluarpat tunnganngikkaluarpalluunniit!

Powered by Labrador CMS