Pisortaane juullikkunni suliumajunnaartoqarsinnaanera pillugu: - Sakkortunerpaamik tatineqaqqavugut

Air Greenland ukioq manna aappassaanik suliumajunnaartoqarnissaanik nalunaarfigineqarsimavoq. Upernaaq Dansk Metal påskinngilaataani suliumajunnaartoqarnissaanik nalunaaruteqarpoq, maannalu Flyvebranchens Personale Union, FPU, juullinngilaattaani suliumajunnaartoqarsinnaaneranik nalunaaruteqarluni.

Air Greenlandip suliumajunnaartoqarsinnaanera ataasinngornermi nalunaarutigaa, ingerlatseqatigiiffillu innuttaasunit juullikkunni angalanissamut pilersaaruteqarlutik ernummateqartunit inuit attaveqaqatigiittarfiisigut isornartorsiorneqarpoq.

Air Greenlandimi pisortaanerup Jacob Nitter Sørensenip Sermitsiaq.AG-mut oqaatigaa, taamatut inissisimasoqarneranut isornartorsiuineq paasisinnaallugu:

- 100 procentimik paasisinnaavara. Pisup kinguneqaatissaanik paasinnissinnaasut tassaapput uanga ingerlatseqatigiiffillu, pingaartumik ukioq manna aqqusaarsimasavut eqqarsaatigalugit inuit pakatsisimanerat 100 procentimik paasisinnaavara.

Nalunaaruteqarsinnaaleriarunik nalunaaruteqarniartut

Pisortaanerup taamatut inissisimasoqarnera ataatsimut isigalugu ajuusaarutigaa:

- Tamanna assorujussuaq ajuusaarnarpoq. Upernaarli isumaqatiginninnialersimavugut. Aasaanerani eqqisseqatigiinnissamik immitsinnut pisussaaffilersimavugut, oktobarimilu isumaqatiginninniarnerit aallarteqqillugit, isumaqarpugullu neqeroorutitsialannik saqqummiussisimalluta.

- Illuatungerisavulli taamatut isumaqanngillat, ulapiffiginerusartakkatsinnut anngutilernerput taakku atorluarpaat, ingerlatseqatigiiffimmullu tamakkiisumik tatisillutik, Jacob Nitter Sørensen Sermitsiaq.AG-mut oqarpoq.

Pisortaanerup sullitat maannakkorpiaq eqqissisarsinnaanngilai, suliaq qanoq ingerlanissaa suli nalunarmat:

- Suliumajunnaartoqarnissaa pillugu aappassaanik suli tigusaqarsimanngilagut, tigusaqaruttalu aatsaat qaqugu suliumajunnaarusuttoqarnersoq paasissavaråut. Suliumajunnaartoqarnissaanik nalunaarummik tiguseqqinniariarutta piffissami pisussanik oqaaseqarsinnaalissaagut taamalu sullitatsinut nalunaaruteqassalluta, Jacob Nitter Sørensen oqarpoq.

Sulisunik mattussinissamik nalunaaruteqarsimanngitsut

Pisortaanerup erseqqissaassutigaa, Air Greenlandimit sulisunik mattussisinnaanermut pisinnaatitaaffik atorneqarnianngitsoq, ingerlatseqatigiiffimmit aaqqiagiinngissuteqarneq annerulersinneqarusunngimmat:

- Isumaqatiginninniarnermi angusaqarnissaq kissaatigiuaannarsimavarput, taamaammat mattussinissamik aalajangiisimanngilagut. Aalajangingassaq taamaallaat FPU-miippoq. Taamatut kissaateqannginnerput sullitatsinnut takutikkusussimavarput, Jacob Nitter Sørensen oqarpoq.

Apeqqut: Tamanna pinngitsoortinniarlugu iliuuseqarnerusimasinnaavisi?

- Illuatungerisat piumasaqaataat naaperiarneqarsinnaasuaannarput, maannali inissisimaffitsinni uagut isummavut naapertorlugit piviusorsiortunik neqerooruteqarsimavugut. Piffissap suliffiusussap eqaannerusumik pilersaarusiorneqartarnissaanut taarsiullugu piviusorsiortumik aningaasarsiat qaffaatissaannik neqerooruteqarsimavugut, Jakob Nitter Sørensen oqarpoq.

- Neqeroorutitsialak

Ullut nalliuttut sioqqutitsiarlugit aappassaanik suliumajunnaartoqarnissaanik nalunaaruteqarneq eqqarsaatigalugu pisortaaneq imatut oqarpoq:

- Soorunami Air Greenlandi Kalaallit Nunaanni attaveqaasersuutit pingaarutillit ilagaat, ullullu nalliuttut suliumajunnaarfissatut toqqarsimagaanni, ingerlatseqatigiiffimmut inuiaqatigiinnullu sakkortunerpaamik tatisinissaq siunertaasimassaaq. Tamannami pissutaasimassaaq taamaaliortoqarnissaanik maannakkut aalajangersimanermut.

Saqisut isumaqatigiissutaat siorna decembarip 31-ani atorunnaarpoq, kattuffimmilu FPU-mi allatsip suliumajunnaartoqarnissaanik nalunaaruteqarnermut atatillugu oqaatigisimavaa, isumaqatiginninniarnerni Air Greenlandimit akissutisiarisimasat annikittuaraasimasut. Jacob Nitter Sørensenip tassunga atatillugu innersuussutigeqqippaa, ingerlatseqatigiiffimmit neqeroorutitsialannik saqqummiussisoqarsimasoq:

Isumaqatigiissitsiniartarfimmi aaqqiissutissarsisoqarnissaa neriuutigineqartoq

- Oqaatigineqareersutut isumaqarpugut, sulisunut neqeroorutitsialannik saqqummiussisimalluta, paasivarpullu neqeroorutigut akuersaanngikkaat, taamaalillutillu sakkoq, tassa suliumajunnaarsinnaaneq atussallugu aalajangersimallutik.

- Taamaammat ilaatigut Isumaqatigiissitsiniartarfimmi suliaq ingerlanneqartussanngorpoq, soorunami tassunga atatillugu neriuutigaara, aaqqiissutissamik isumaqatigiissuteqarsinnaassalluta, Jacob Nitter Sørensen oqarpoq.

Pisortaanerup isumaqatiginninniartoqarnera eqqarsaatigalugu oqaatigerusunngilaa, Air Greenlandip saqisullu aaqqiagiinngissutigisaat sunnersut.