qinersineq
Pisoqarfik: Qinersineq ammarpoq
Qinersiartortut nuannaarlutik qinersiartorput. Kisianni Nuummi aamma qinersinerup inernissaa aarleqqutigineqarpoq
Aput nutaaq tussimavoq, nillataartumik anorsaalaannguarpoq aqqusernillu juullerpaluttunik pinnersarneqarsimapput. Inuit qungujulaartut neriuuteqarpasissullu Nuummi sumi tamani takussaapput.
Kalaallit Nunaanni Inatsisartunut qinersineq ammarneqarpoq qinersiviillu tamarmik ullaaq nalunaaqutaq 09.00 ammarneqarput. Nuummi ileqquusoq malillugu kulturikkut illorsuarmi Katuami qinersineq ingerlanneqarpoq, pisarnertut qinersinermi aqutsisoq aallarniilluni oqaaseqaqqaarpoq taasinernullu nakkartitsiviit imaqanngitsut taasiartortunut qinigassanngortittunullu takkussimasunut tamanut takutinneqaqqaarput.
Meeqqat inersimasullu Katuamut takkussimapput.
- Suna pineqarnersoq meeqqamma soorunami naluaat, susoqarnerali takorusullugu uteriileriarmata atuariartuussinnginninni meeqqerivimmukaassinnginninnilu ilagilluaannarakkit, anaanaq marlunnik meeralik oqarpoq.
Sumi tamani inuit qungujulaartut takussaapput illarpaluttoqartarlunilu, taamaakkaluartorli ernumasoqalaarnera aamma malugineqarsinnaavoq.
- Nutaamik aallartittoqarsinnaanera neriuutigeqaara, sulineq aallartittariaqarpoq aamma ingerlaqqittariaqarpugut, qinersiartortut tulleriiaarsimasut akornanniittut ilaat nassuiaavoq.
Partii Naleqqap siulittaasua Hans Enoksen, Siumup siulittaasua Kim Kielsen aamma Inuit Ataqatigiit siulittaasuat Sara Olsvig manna tikillugu taasiartorsimalereerput. Qinersiviit tamarmik unnugu nalunaaqutaq 20.00 matussapput.
Nuummi Katuami qinersiviup ammarneqarneranit assit Sermitsiaq.AG-mit saqqummiunneqangajalerput