Pisoq pingaarutilik: Aqerloq 1 ton qassutaarsiutillu kilometererpassuit qallorneqartut
Pinngortitaleriffik 2022-mi qassutaarsiutinik ningittagaarsiutinillu qalluiartoqqissimavoq, tamannalu ilaatigut aqerlup 375 kiilut allat qaqinneqarnerannik kinguneqarpoq. Taamaalillutik qaqinneqartut ukiut pingasut ingerlaneranni 1 tonsinngorput.
Nuup Kangerluani Qeqertat Tertiillu akornanni ulluni unnuanilu pingasuni affarmilu saliisoqarnerani qassutaarsiutit 2 kilometerit ningittakkallu 7 kubikmeterit qallorneqartut akornanniipput.
Tamatuma saniatigut Qooqqut saavanni pullatit suli allat qulit qaqinneqarput, aqerlorlu katillugit 375 kiilunik oqimaassusilik immap naqqanit qaqinneqarluni.
Taama Pinngortitaleriffik saliinermik isumaginnissimasoq nittartakkamini saqqummiussivoq.
2022-mi Nuup Kangerluani saliineq aalisartut najukkameersut peqatigalugit ingerlanneqarpoq, pinngortitaleriffik ukiut tulleriinnaat pingajussaanni qassutaarsiutinik ningittagaarsiutinillu qalluiartorsimavoq. 2020-mi 2021-milu saliinerit Qeqertarsuup Tunuani ingerlanneqarput.
Saliiartorlunilu angalasarnerni Avatangiisinut Aningaasaateqarfimmit aamma Ilisimatusarnermut Siunnersuisoqatigiinnit aningaasalersorneqartuni qallorneqartartut annikitsuinnaasanngillat.
Pinngortitaleriffik naapertorlugu ukiut pingasut taakkua ingerlaneranni makkua qallorneqarput:
- Qassutaarsiutit 10 kilometerit
- Pullatit 25-t
- Ningittakkat 12 kubikmeterit
- Aquuteralak ataaseq
- Puttatitsissutit saviminersuit sisamat
- Allunaasat
- Puttaqutit
- Kitsat allallu
- Aqerloq 1.061 kg
Ilisimatusartoq Rasmus Nygaard, aningaasaliissutinik qinnuteqarlunilu saliinernik aqutsisuusimavoq. Nygaard tamatuma saniatigut assiliisarsimavoq angalanernillu assilisat matuma ataaniittut suliarisimallugit: