Pisisartut Greenland Expressimut kamattut

Angut timmisartortitseqatigiiffimmik Greenland Expressimik pilersitsisoq, uani sapaatip-akunnerani Denim Airimik pisisoq, Gert Brask, timmisartortitseqatigiiffiup aasaanerani angalanissat tamaasa unitsinneranik pissuteqartumik bilitsit atorneqanngitsut akiisa nalingi suli utertinngilai.

KNR nittartakkamini taama allappoq.

Bilitsinik pisisimasut akiliutaat utertinneqassasut Gert Braskip septembarimi neriorsuutigigaluarpaa.

Atuaruk: Greenland Express Air attavigineqarsinnaajunnaartoq

Neriorsorneqarsimasut
Ilqutariit Jimmy Rødgård Hansenikkut siorna juulip qaammataani Narsarsuarmiit Københavnimut utimullu billettisipput. Billettillu akii, 18.000 koruunit, suli Greenland Expressimit utertinneqanngillat.

- Neriorsornikuaatigut taamani timmisartuussinissat unitsinneqarmata, sapaatip akunnera aallarnissarput sioqqullugu, bilitsit utertinneqassasut. Uniinnartutut nammineq nalilersinnaanngilara. Soorunami taanna suliffeqarfik taanna inuk aallartitseqqissappat soorunami malersoqqissavarput, Jimmy Rødgård Hansen KNR-imut oqarpoq.

Atuaruk: Gert Braskip ukioq manna angallassinissani taamaatippai

Maanna iliuuseqarsinnaanngikkallartut
Jannik Isodor, Atuisoqarnermut Unammillernermullu Aqutsisoqarfimmi immikkoortortami pisortaq neriuppoq naammagittaalliuutit ukiup affaata iluani suliarineqarsinnaassasut.

Gert Brask aningaasanik utertitsissalluni neriorsueqqippoq.

- Uanga iluatsikkuma taava uanga nammineq isumagiumaarpakka. Kisianni massakkut susinnaannginnatta.

- Massakkut inatsisilerituup suliarivai. Oqaasissaqanngilanga tamakku inatsisilerituukkooramik massakkut, ingerlatsivimmi maanna Sky Greenlandimik ateqartumi pisortaq, Gert Brask, KNR-imut oqarpoq.

Taassuma maanna timmisartortitseqatigiiffiup atia allanngortippaa, maanna Sky Greenlandimik ateqalerpoq.

Atuaruk: Brask timmisartortitseqatigiiffimmiik pisivoq