Pisinnaatitaaffiit meeqqamit paasineqarsinnaasut

FH-ip meeqqat pisinnaatitaaffiit pillugit isumaqatigiissutai meeqqanut paasineqarsinnaanngorlugit maanna saqqummiunneqarput

Tamaat ataatsimut isigalugu paasiuminaatsuusariaqanngikkaluarpoq: Inersimasutut meeqqat illersorlugillu paarisussaavavut, inuttut nammineq ineriartorlutillu ajunngitsumik atugaqarnissaat kiisalu ilinniagaqarnissaat qulakkeertussaavagut. Meerarpassuilli ulluinnarni atugaasa takutippaat, FN-p meeqqat pillugit isumaqatigiissutai naapetorlugit meeqqat tunngaviusumik pisinnaatitaaffiisa malinniarnerat suli ajornartorsiutaasoq.

Meeqqat pillugit isumaqatigiissut ullumi ukiunik 30-nngortorsiorpoq, UNICEF-illu isumaqatigiissut meeqqat peqataasinnaatilerlugit meeqqanut paasiuminartunngorlugu saqqummiussinermigut tamanna nalliuttorsiutigivaa.

- UNICEF-ip Kalaallit Nunaanni allaffiani ukiaq, MIO aamma NAKUUSA-mi Meeqqat Siunnersuisoqatigiivi peqatigalugit oqaasertaliorluta suliaqarsimavugut. Meeqqat pillugit isumaqatigiissut kalaallisut atuaruminartoq kikkunnit tamanit pissarsiarineqarsinnaanngornera nuannaarutigaarput, UNICEF-ip Kalaallit Nunaanni suliniutinut pisortaa Sara Olsvig oqarpoq.

- Meeqqat pillugit isumaqatigiissutip meeqqanut paasiuminartup oqaasertaliorneqarnera FN-ip meeqqat pisinnaatitaaffii pillugit ataatsimiititaliaanit, Meeqqat pillugit isumaqatigiissummik nunanik misilitsitsisartumit taperserneqarsimavoq. Kalaallisoortaata pigilernissaa uagutsinnut pingaaruteqarluinnarsimavoq, nuaannaarutigaarpullu MIO aamma NAKUUSA-mi Meeqqat Siunnersuisoqatigiivi ikiortigalugit oqaasertaliussamik suliaqarsinnaasimanerput.

UNICEF aamma plakatiuteqarpoq, taakku aqqutigalugit meeqqat pisinnaatitaaffii eqqaamaneqarsinnaapput.

- Meeqqat nunarsuarmit tamarmeersut, aamma Kalaallit Nunaanneersut, meeqqat pillugit isumaqatigiissutip meeqqanut paasiuminartup assitassai kusanartut qalipaatigissaartullu toqqaaqataaffigisimavaat, Sara Olsvig oqaluttuarpoq.

Sara Olsvigip erseqqissaatigaa, inersimasut aamma isumaqatigiissut meeqqanut paasiuminartoq atuarluarsinnaagaat.

- Meeqqat pillugit isumaqatigiissutip ukiuni 30-ni atuussimanerani pitsaasorpassuarnik angusaqartoqarsimavoq, meeqqalli tamarmik pisinnaatitaaffimminnik iluaquteqalernissaannut suli suliassarpassuaqarpoq, aamma Kalaallit Nunaanni. Meeqqat pillugit isumaqatigiissut paasiuminartoq iluaqutigalugu neriuutigaarput, meeqqat inersimasullu tamarmik paasisaqarneruffigissagaat, meeqqat pisinnaatitaaffiini suut pineqarnersut, aamma isumaqatigiissummi immikkoortut ataasiakkaat sunik imaqarnersut.

Meeqqat pillugit isumaqatigiissut atuaruminartoq UNICEF Danmarkimit aamma danskisuunngorlugu saqqummiunneqarsimavoq.

Powered by Labrador CMS