Pisiniarfiutilik: Ajorluinnarpoq!
Pisiniarfiutiliup Avaruna Egedep Igalikumeersup, pisiniarfiutini caferlu qanittuaniittoq ikuallatsinneqarsimaneri tupassutigingaatsiarpaa.
Avaruna Egede aappaalu ataasinngornerup unnuaani matukkut kasuttortumit itertinneqarput. Pisiniarfiutaa B-44, Cafe 44-llu illutaa, aappariit pigisaat, ikuallapput.
- Aqqutaani imminut piareersarpunga innerujussuarmik takunialeqigama. Tassani misigissutsit nalunaqaat, apeqqutissarpassuaqarpungali. Sooruna? Kinaana taamaaliortoq? Avaruna Egede Sermitsiaq.AG-mut oqaluttuarpoq.
Ataasinngornerup unnuaani nalunaaqutaq ataatsip missaani Nanortalimmi politiit ikuallattumik takunnittoqarneranik nalunaarfigineqarput.
Illut eqqaanni ikuallajasumik politiit ataasinngornermi nassaarput. Illut 100 miiterisut imminnut ungasitsigipput, aappariinnillu pigineqarlutik. Avaruna Egedep atisaarniarfimmik ingerlataqartuuvoq, aappaatalu anaanaata cafe ulluinnarni ingerlataraa.
- Ikuallanneqarsimanera ulluinnarni sunniuteqassaqaaq, sunniuteqalereeqaarlu. Naqqaniit inerisarnikuullugu, mærkenik nuannarisannik katersinikuullunga, illoqarfeerarlu nutaalianik mærkeuteqartillugu pilersornera tulluusimaarutigalugu taama pineqarneq annernaqaaq, inerisaaneq annertooq atornikuullugu, oqarpoq.
Namminersortoq inuusuttoq
Avaruna Egede ukiuni arfineq-marlunni namminersortooreerpoq. 21-nik ukioqarluni atisaarniarfimmik ammaavoq.
Sermitsiaq.AG-mut nassuerpoq pisiniarfiup cafellu ikuallatsinneqarneranik ilisimatinneqarami namminersortutut unissanerluni eqqarsaatigisimallugu.
- Namminersortuuneq nuannersorpassuaqarmat namminersortoorusuppunga. Nassuerutigissavarali unnuaq (ataasinngornerup unnuaani, aaqq.) nalornigama ingerlaqqikkusunnerlunga. Misigisarmi annernaqimmat, oqaluttuarpoq.
Ikuallattoqarsimanera piaaraluni ikuallaasimanertut politiinit paasiniarneqarpoq. Politiit pasisaqanngillat tigusarisaqarsimanatillu.