Pisiniarfiutilik ugguartoq: - Taamaatitsiinnarneruvoq
Dorit Olseni sulisussamik piukkunnaatilimmik maannakkorpiaq pisariaqartitsivoq. Arnamik ilinniarluarsimasumik 30-kkunik ukiulimmik sulerusuttumik nalunngisaqarpoq, meeqqerivinnili inassaqartitsisoqanngimmat sulilersinnaanngitsumik.
Ajornartorsiut erseqqissoq.
Kalaallit nunani allani ilinniagaqartut ilinniakkaminnik naammassinnikkaagamik nunatsinnut uterneq ajorput, inissaqannginnertik meeqqerivinnilu inissaqartitsisoqannginnera pissutaallutik, Nivi Olsen Demokraatineersoq oqarpoq.
- Nalunngilarput suna ajornartorsiutaasoq. Taamaammat tupaallaatigaara, ilinniartitaanermut naalakkersuisutut akisussaasup tamanna erseqqinnerusumik misissuiffiginiarnerlugu akissuteqannginnera.
Ilinniartitaanermut naalakkersuisoq Peter Olseni ajornartorsiut pillugu pingasunngornermi apeqqarissaarfigineqareersoq taamatut oqarpoq.
Inissaateqartoqanngitsoq
Dorit Olsen Nuummi Dooit Design-imik piginnittuusoq Nivi Olsenip oqaatigisaatut maannakkorpiaq inissisimavoq.
AAMMA ATUARUK: Kalaallit nunani allani ilinniagaqartut: Affaasa missaanniittut nunatsinnut uteqqittarput
Pisiniarfiutilik sulisussamik piukkunnaatilimmik maannakkorpiaq pisariaqartitsivoq.
Ilaqutariinnik kalaallinik Danmarkimi ilinniakkaminnik naammassinnikkamik Nunatsinnut utersimasunik nalunngisaqarpoq. Arnarli Dorit Olsenip pisiniarfiutaani sulerusulluinnaraluartoq, meeqqani paaqqutariniarlugu angerlarsimaannartariaqarpoq. Meeqqerivinni inissaateqartoqanngilaq - utaqqisorpassuummatalu qaqugorsuarmut inissaateqartoqarnavianngilaq, Dorit Olsen nassuiaavoq.
- Arnaavoq 37-nik ukiulik silassorissoq, piginnaasalik ilinniarluarsimasorlu nammineerlunilu iliuuseqarsinnaasoq. Sulisumik danskisut, tuluttut kalaallisullu oqalussinnaasumik pisariaqartitsivunga. Arnap taassuma oqaatsit taakku atorsinnaavai. Ukiortaamiilli angerlarsimaannarsimavoq, suliffinnilu sulilersinnaanani. Ajornartorsiuteqarpugut:
- Ulapittupilussuuvunga, stressilersinnaavunga sulisinnaasoq taanna pisariaqarteqingakku. Tamatumunnga peqatigitillugu ilaqutariinnguit ataasiinnarmik pilersuisoqarput.
- Taamaatitsiinnarnerusoq
Dorit Olsenip nassuiaatigaa, arnaq taanna 37-nik ukiulik sulisorerusunnerungaluarlugu allamik sulisussarsiortariaqalerluni.
- Piukkunnaatilimmik sulisussarsiniarneq ajornaatsuinnaanngilaq. Aana arnaq sulerusuttoq periarfissaqanngitsorli. Taamaatitsiinnarneruvoq, taanna oqarpoq, nangillunilu:
- Politikkerit aaqqiissutissarsiornissamut akisussaaffeqarput. Ilinniartut (ilinniakkaminnik naammassinnissimasut) uterneq ajorput, meeqqatimmi inissaqarnissartillu eqqarsaatigalugit qanoq iliussagamik, Dorit Olsen tamanna inuiaqatigiinni ajornartorsiutaasoq isumaqartoq aperivoq.
Nassuiaatigaa pisiniarfimmini inuppassuit Kalaallit Nunaannut suliartorsimasut naapittarlugit, meeqqerivinnilu inissaateqartoqartannginnera aporfiusartoq paasisimallugu.
Sermitsiaq.AG-mit isornartorsiut Peter P. Olsenimut oqaaseqarfigitinniarneqarpoq, sulili akissuteqartoqanngilaq.