Nuuk

Pisiniarfiutilik: Iliuuseqarsinnaajuarpugut

Kop og Kande Nice qanittukkut innarluutilimmik sulisoqarsimavoq. Ikiuukkumatuneq suliniuteqartup inuunermini najoqqutarigunarpaa

– Isumaqarpunga annikinnerusumik ikiuuttut kusanarsaaniartoqarneratigut maluginngitsoorneqartarnerat uggornartoq, Naja Kleist Storch oqarpoq

Kinaluunniit ikiuussinnaavoq. Pisariitsuuvoq. Piumassuseqarneq ammasuunerlu apeqqutaaginnarput, Naja Kleist Storch oqarpoq.

Taassuma qanittukkut niuertarfimmi ikiortitut tarnimigut innarluutilik sulisorilerpaa. Kommunimit saaffiginnissutaasimasoq naaggaarsinnaanngisaa.

– Innarluutilimmik niuertarfimmi sulisoqarneq nalinginnaasuugunanngilaq, ikiuunnissarali pissusissamisoortutut isigaara ingammik arlaanut nuannaarutissaasoq takusinnaagukku, taanna oqarpoq.

Nammineerluni unippoq

Innarluutilik pisiniarfimmi qaammat ataasiinnaq sulisimagaluarpoq, namminerli piumasaminik unissimalluni.

Kop og Kande Nice CSR-mik (suliffeqarfiit isumaginninnikkut akisussaaqataanerat) aaqqissuussinermi peqataanngilaq, tamannalu aamma pisariaqanngilaq, piginnittoq oqarpoq.

– Assersuutigalugu ikiuiniarluni suliniutinut kikkut tamarmik 800.000 koruuninik tunniussinissaminnut akissaqanngillat. Taarsullugu uagut taamaasiorpugut inussiarnersumik kiinnertarnikkut, qanilaarnikkut periarfissatigullu ikiuuttarnitsigut. Nutaanillu sulisoqaleraangama tamatuminnga nassuiaateqqissaartarpakka, taanna oqaluttuarpoq.

Tassami sulisuni inuunermini najoqqutarisaminik paasitittarpai, pisinianik pitsaasumik sullissisinnaaqqullugit.

Naja Kleist Storchili naapertorlugu tamatumunnga sapiissuseqartariaqarpoq. Pisisartunut saaffiginninnissamut sapiissuseqarneq.

– Pisiniarfimmut isertut tikilluaqquneqarlutik misigissapput. Akuttunngitsumik pisiniartuvut oqaloqatigilersarpavut, taavalu oqaluttuanik angisuunik mikisunillu tusartarpugut. Tamatigut pisiaqarneq ajorput, uagulli tamatigungajak ikiuinissatsinnut isumassarsisinneqartarpugut. Aamma tamakkua kingunerigajuppaat arlaannik isumaqatigiissusiorninnik. Ajornanngeqaaq, saaffiginninnissamut sapiissuseqaannassaaq.

Oqaluttuaq tamaat Nuummilu angisuunik mikisunmillu pisut atuakkit. Nuuk Ugeavisi akeqanngitsumik aasinnaavat:

Powered by Labrador CMS