internetti

Pisiniarfiup pisortaa: Tele-Postimi internettimik atueqqinngisaannassaanga

Sermitsiaq.AG-p pisiniarfiup pisortaa ataasinngornermiillu internettimut attaveqarani isumatsaqqanera pillugu oqaluttuarneranit nalunaaquttap akunnerata affaa qaangiutiinnartoq ajornartorsiut iluarsineqarpoq. Aaqqiissuteqapallattoqaraluartorli taanna Tele-Postimi internettimik atuisuujunnaarpoq.

Butikschef i Panasonic Center Nuuk, Otto Martinsen, der ses til venstre, vil opsige Tele-Post og finde en anden internetleverandør.

Panasonic Center Nuummi pisiniarfiup ittua Otto Martinsen, Sermitsiaq.AG-mut saaffiginnissuteqareerluni nalunaaquttap akunnera qaangiutiinnartoq internettimut attaveqaataa iluarsineqarmat nuannaaqaaq. Aningaasalli tuusintilikkuutaat kaaviaartitassaraluit tingusinnaanngilai. Internettimut attaveqanngilaq, pisiniarfimmi dankortimik akiliisoqarsinnaanngilaq, taamaammat ataasinngornerup uullaarnganiillu pisiniat arlallit pisiniarfimmi pisiaqaratillu ingerlaqqiinnartarsimapput.

Pisortaaneq suliamut akuliuttoq

Tele-Postimi sullitanut pisortaq Brian Smedemark, aaqqissuisoqarffiup attaveqarfigimmani ajornartorsiummillu paasitillugu, suliamut akuliuppoq. Malitsigisaanillu ajornartorsiut ingerlaannaq aaqqinneqarpoq.

- Nioqqutigineqartut, atuisup pigisaa, angerlasimaffinnut naleqqussangaavoq taamaammallu suliffeqarfinnut nioqqutissiatsinniit kiffartuussinertai pitsaassusaalu tassunga sanilliullugit qaffasitsiginatik. Inuinnarnut tuniniakkanut pisinerani pikkoriffigisimanngilarput kingunerisinnaasaanik oqaluttuunnissaa, Brian Smedemark nassuiaavoq.

Nassuiaanerlunneq

Nassuiaateqarlu Otto Martinsenip tigulluanngilaa. Taassuma oqaatigaa pisiniarfimmik ammaalernermini dankortterminalimut fax-imullu atorsinnaasumik internettimut attaveqarnissani Tele-postimi tuniniaasumut nassuiaatigisimallugu.

- Taamanili aaqqiissutissaq eqqortoq takutinneqarsimasussaangaluarpoq. Killormuanillu qaammatit arlallit qaangiunnerini suliffeqarfinnut nioqqutissiamik saqqummiiffigineqarpunga, akisunerujussuummalli piumasimanngilara, Otto Martinsen nassuiaavoq.

Sullissisoq nutaaq

Internettimik neqerooruteqartumik allamik taarsiissalluni aalajangersimavoq, taanna pisiniarfiup ittuata pisariaqartitai paasiumallugit pingasunngormalli pisiniarfiutaanut alakkaasimavoq.

- Suliffeqarfik kisermaassilluni taamatut pissusilersornera qatsutsiivippara, taanna oqarpoq, annaasaqataatingisimasanilu taarserneqarnissaat naatsorsuutiginngilaa. Qularinngilluinnarpaali misigisimasaminik allarpassuit aamma ajornartorsiutigisimassagaat.

Powered by Labrador CMS