ilinniartitaaneq
Pisiniarfimmiunngortut siullersaannik assilisat takukkit
Asiaq Nielsenip pisiniarfimmiunngorniani siullersaalluni naammassinera Nuummi Niuernermik Ilinniarfimmut immikkut ittuuvoq
Sisamanngorneq 28. maj Asiaq Nielsen pisiniarfimmiutu ilinniarnermini naammassivoq. Ulloq pingaartuuvoq Asiaannaanngitsumut, kisianni aamma Niuernermik Ilinniarfimmut Nuummiittumut, tassami ilinniarfimmiit maanngaaniit taamatut ilinniarsimasumik aatsaavissuaq naammassisoqarmat, Katrine Hvid Kaiser Niuernermik Ilinniarfimmeersoq tusagassiorfinnut nalunaarummi oqaluttuarpoq.
Asiaq soraarummeerfimminiit sisamanngornermi ualikkut anillammat nasartaassaa ruusarlu kanaartakkaaq tunniunneqarput. Ilagaalu qaninnerpaasani.
Katerisimaarnerup kinguneraa, Niuernermik Ilinniarfiup Nuummiittup aappalaartuanik Asiap amusinera.
Asiaq Nielsenip Brugseni Nuummiittoq arlaleriarluni praktikkerfigisimavaa, ullorlu tallimanngorneq 29. maj naammassilluni, Katrine Hvid Kaiser paasissutissiivoq.
Nuummi Niuernermik Ilinniarfimmi nuisitsineq
TNI-mi pisiniarfimmiunngorniat ileqqoq malillugu Nuummi Niuernermik Ilinniarfimmi aulami marlunngorpat nuisitsinermik aaqqissuussissapput.
Ilinniartut piareersaatimittut Nuummi illoqarfimmi pisiniarfinnik misissuisimapput pisiniarfinnillu kiisalu nioqqutissanik ilisaritikkusutaminnik toqqaajartorsimallutik. Ulloq aallarnerlugu ilinniartut ullaakkut atuariartorunik saqqummersitassaminnik ilisarititassaminnillu piareersaassapput. Nuisitsineq ilinniarfimmiinnermi matumani atuartut naggataarutitut misilitsinnerissavaat. Taama ilinniarfik tusagassiorfinnut nalunaarummi allappoq.