Pisiniarfiit tamarmik ikiorsiissutit isornartorsiorneqarnerannut isumaqataanngillat

Nuummi pisiniarfinnik piginnittut ilaasa ikiorsissutit, suliffeqarfiit coronap ajornartorsiutaanerani ikiorsiissutissaasa annertussusaannik isornartorsiuisut, pisiniarfinnit allanit uppernannginnerarneqarput.

Panasonic Center Nuummiittoq nipaammiuvoq. Pisinianik ulluni makkunani isertoqarpallaarsimanngilaq, taamaassimavorlu martsip 18-iani illoqarfiup annersaa matuneqarmalli. Otto Martinsenimulli Panasonic Centerimi pisortaasumut ajornartorsiornermi ataatsimoornissaq ajornartorsummillu qaangiinissaq pineqarput.

- Aningaasanik isaatitsinissaq pineqanngilaq. Pisiniarfup aniguinissaa pineqarpoq. Aamma peqqissuujuarnissarput virusimillu matumanna annannissaq pineqarput, Otto Martinsen oqarpoq.

In Fashionimik piginnittoq Hanne Lisa Berthelsen tassunga isumaqataavoq.

- Ikiorserneqarsinnaaneput qujamasuutigiinnarpara. Ikiorsiissutisssat ilaannik qinnuteqarsimavunga, sulili akissutissarsinanga, Hanne Lisa Berthelsen oqarpoq.

Pisiniarfiutillit taakku marluk isumaqarput, Nuuk Centerimi pisiniarfiit matoqqatinneqarnertik pissutigiinnarlugu immikkut eqqugaasimanngitsut.

Pisiniartoqanngitsoq

Pisiniarfiit matoqqatinneqartut aalajangersimasumik aningaasartuutigisartakkatik ikiorsiissuit aqqutigalugit matussusertissinnaavaat, pisiniarfiilli suli ammatinneqartut aningaaasartuutimik 80 procentii matussusertissinnaallugit, tassani apeqqutaalluni kaaviiaartitassatut annaaneqartut qanoq annertutigineri.

Otto Martinsenip erseqqissaatigaa, maanna pisoq nalinginnaasumit allaanerujussuusoq.

-Ammangaluarluta pisinianik isertoqarneq ajorpugut. Illoqarfik tamangajammi matuneqarmalli inukisaarsimaqaaq, taanna oqarpoq.

Aalajangersimasumik aningaasartuutaasartut ikiorsiissutinit matussuserneqarsinnaasut

Uku pineqartut nalinginnaasumik ilanngunneqarsinnaapput:

Ineqarnermut akiliut

Atuinermi aningaasartuutit

Attartortitsinissamik isumaqatigiissutit

Taarsigassarsiat erniaat

Ukiumoortumik aningaasartuutaasartut, soorlu sillimmatit, motoorinut aningaasartuutit il.il. (qaammammut agguaqatigiissillugit agguaanneqartartussat)

Pisiniarfiit pinngitsaalisaasumik matoqqatinneqartut aalajangersimasumik aningaasartuutigisartakkatik tamaasa matussusertissinnaavaat. Pisiniarfiit allat 80 procentit angullugit ikiorserneqarsinnaapput.

Hanne Lisa Berthelsenip oqaluttuaraa, pisiniarfiit tamarmik assigiimmik pineqannginnerat aallaqqaammut nuannarivallaarsimanagu.

- Unnuakkut sinilluartarluni iluassangaluarpoq. Kaaviiaartitaqannginneq aningaasarsiassaqartitsinnginnerlu aamma pisinianit ikittunnguanit tunillatsissinnaaneq anngilaanngatiginagu. Pisiniarfipput pinngitsaalisaasumik matuneqarsimasuuppat tamakku anngilaanngtigisimassanngikkaluarpakka, taanna oqarpoq.

- Pisiniat ilaasa aamma oqarfigisarsimavaatigut, ammatitsiinnarnerput kukkusuusoq, tamattami angerlarsimanissarput eqqarsaataasimammat, taanna itisiliivoq.

Tamarmik ilungersortut

Hanne Lisa Berthelsenip tunillatsinnisssaq annilaangatigingamiuk, aamma kaaviiaartitaqannginnami sulisumi aningaasarsiassaanut akissaqarpiannginnami pisiniarfik ullualunni matoqqatissallugu aalajangersimavaa. Misissorneqarsimasulli arlallit tunillatsissimannginnerannik nunatsinni nakorsaaneq nalunaaruteqartalermat, eqqissiimeriarami pisiniarfik aammaqqissimavaa.

- Pisiniarfiutillit pinngitsaaliissummik matuneqarsimasut pakatsisimaarnerat paasilluarsinnaavara, tamattali assigiimmik atugaqarpugut. Inissisimanerput nalorninartoq qaangerniarlugu ataatsimoortariaqarpugut, Hanne Lisa Berthelsen oqarpoq.

Panasonic Centerimi pisortap erseqqissaatigaa, nunami aningaasaqarnikkut ikiorsiissuteqarsinnaasumi najugaqarami iluatsitsisimasutut misigisimalluni.

-Amerlanerit ajornartorsiummik matumannga aniguissaqqaarput. nunarsuarmili sumiiffippassuarni pisiniarfiutillit ikiorserneqarsinnaanngillat, Otto Martinsen oqarpoq.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS