suliffeqarneq

Pisiniarfiit aamma sanaartortut nunanit allaneersunit pissarsisariaqartartut

Brugseni, Permagreen aamma Per Aarsleff kalaallinik sulisunik pissarsiniarnertik ajornakusoortippaat

Neqaarniat, iffiortut, igasut aamma sanasut.

Suliffeqarfiit amerlasuut atorfinnut taama ittunut kalaallinik qinnuteqartussanik amigaateqarput.

- Neqaarnianik, iffiortunik igasunillu pissarsiniarneq ajornakusoortarpoq. Assersuutigalugu maanna ukiup affaata ingerlanerani Nuummi Brugsenimut neqaarniamik pissarsiorsimavugut, tassungalu qinnuteqaat ataasiinnaq pissarsiarisimallutigu, taannalu nunatsinneersuunani, Brugsenimi pisortaq, Susanne Christensen oqaluttuarpoq.

Kalaallit sulisut paariinnarniarsarisaraat
SIK-mi siulittaasup Jess G. Berthelsenip siornatigut suliffeqarfiit arlallit, ilaatigut Brugseni, nunanit allaneersunit sulisoqarpallaarnera pillugu isornartorsiornerata kingorna, Susanne Christensenip SIK oqaloqatigeqqammerpaa.

Tamannalu pisiniarfiutillip siunertarinngikkaa, Jess G. Berthelsen ilisimatinneqarpoq.

Annertuumik ajornakusoortitsisut
- Pisortaasoq Susanne Christensen oqaloqatigilluarsimavara, ilinniarsimasunillu sulisussarsiornerup unammillernartui pillugit eqqartueqatigiissimalluta. Ataqatigiittariaqarpugut unammillernartullu taakkua aaqqiissuteqarfigalugit, taamaalilluta sulisut nunatsinneersut amerlanerusut suliffinnik taakkunannga tigusisinnaanngortillugit, Jess G. Berthelsen oqarpoq.

Brugsenip saniatigut suliffeqarfiit Permagreen aamma Per Aarsleff kalaallinik ilinniarsimasunik sulisussarsinissamik annertuumik ajornakusoortitsipput.

Nuussinnaanngitsut
Suliffeqarfik sanaartugassanik suliassinneqartartoq Permagreen Kommuneqarfik Sermersuumi suliassamini sulisussanik nunani allaneersunik tikisitsinissamut 2015-imi 20-riarluni qinnuteqarpoq akuerineqarlunilu, KNR-imi misissuinerup tamanna takutippaa.

Permagreenip pisortaa naapertorlugu, nunanit allanit sulisunik tikisitsisarneq, sanasut nunaqavissut ilinniarsimasut ilinniarsimanngitsullu suliartorlutik, najugaqarfigisami qanittuinut nuukkusunneq ajornerannik pissuteqarpoq.

- Sulisinnaasut sungiussisimanngippallaarput oqqassanatik: ‘Suliartorlunga avunngarsinnaavunga. Taavani suliffissaqarpoq’. Kalaallit Nunaanni - allanilumi - soorunami ilaquttat piffissami sivisunerusumi sivikinnerusumiluunniit qimanneqarsimasarput. Kalaallilli Nunaanni tamatumunnga piareersimanngillat. Sungiusimaneqanngilaq.

- Assersuutigalugu maanna Narsami suliassat ikiliartorput, uagullu oqarpugut: 'Qaqortumut qaammatini arlalialunni sulerusunngilatit? Tassani ilinniarnertuunngorniarfimmik sanaqqiinermik suliaqarpugut. Kisianni tunuarsimaartumik akineqartarpugut. Aamma pinartumik suliaqarpugut, tassanilu Maniitsumukartitserusukkaluarpugut. Kisianni piumasoqanngilaq, imaluunniit pisinnaasoqanngilaq. Taamaammallu nunanit allanit tikisitsisariaqalerpugut, Preben Kold, KNR-imut oqarpoq.

Allaaserisaq tamaat KNR-imi atuaruk: Pisortaq: Kalaallinik sulisoqarniarneq ajornakusoorpoq

Powered by Labrador CMS