Pisiniarfeeraq ikuallattoq: Ajoqusersimasoq killisiorneqarsimavoq
Kangaatsiami pisiniarfeeqqap ikuallatsinneqarneranut suliaq Aasianni politiit suli paasiniaaffigaat. Ajoqusersimasoq politiinit oqaloqatigineqareersimavoq.
Kangaatsiami pisiniarfeeqqamik ikuallaasoqarneranut tunngatillugu suliaq Aasianni politiinit suli paasiniaavigineqarpoq.
Politikommissær Aqqaluk Petersen, Aasianni politiinit paasiniaarnermik aqutsisoq oqaluttuarpoq ajunaartup timaa misissorneqassasoq, misissuinerlu sapaatip akunnerata tulliani ingerlanneqarumaartoq.
- Danmarkimiit ikuallattoqarsimatillugu paasiniaasartut suleqatigaagut. Paasissutissat pigisagut tamaasa taakkununnga nassiunnikuuagut. Paasissutissat nalilersorpaat, paasiniaanermilu qanimut suleqataallutik, Aqqaluk Petersen oqarpoq.
Ilisimannittut apersorneqarput
Aasiaat Politiivii marlunngornermi unnukkut kalerrinneqarput Kangaatsiami pisiniarfeeraq ikuallattoq. Pisiniarfeeraq nungulluni ikuallappoq. Ikuallaasutullu pasineqartoq ikuallannermi ajunaarpoq. Inuk alla ikuallannermi ajoquserpoq, passunneqarnissaalu pillugu Nuummukaanneqarsimalluni.
- Ikuallannermi ajoqusertoq politiinit ippassaq oqaloqatigineqarpoq. Ilisimannittut allat aamma oqaloqatigineqareerput, Aqqaluk Petersen ilisimatitsivoq.
Politiit suli ilisimatitsissutigisinnaanngilaat ikuallannermi ajoqusertoq pisiniarfeeqqamut qanoq attuumassuteqarnersoq. Aamma ikuallanneq qanoq aallartinneqarsimanersoq ikuallaasoqarneranullu tunngaviit suunersut politiinit suli oqaatigineqarsinnaanngillat.
Aasianni politiit naatsorsuutigaat suliami paasissutissat nutaat sapaatip akunnerata tulliani saqqummiunneqarsinnaalissasut.
Sermitsiaq.AG-p paasitinneqarnera naapertorlugu Kangaatsiami atuartut ilaat innuttaasullu ilaat pisiniarfeeraateqartunut katersuiniarlutik aallartissimapput.