imigassamut inatsit
Pisiffiup imigassaq pillugu neqeroortutaa Namminersorlutik Oqartussanit iliuuseqarfigineqarpoq
Viinninik, immiaaqqanik imigassanillu aalakoornartunik ilaasortat akikillisaaffigineqarsinnaanerat Pisiffimmit neqerooruteqarpoq. Suliniut Facebookikkut ingerlanneqarpoq. Peqqinnissamut Naalakkersuisoqarfiup tamanna iliuuseqarfiginiarpaa, naak imigassamut inatsit suli atuutilinngikkaluartoq
Pisiffik Facebookikkut ima neqerooruteqarpoq:
Ilaasortanuinnaq
"Nutaaliatsinnut 18 lounge-mut ilaasortanngorit annerusumillu takusaqarlutit immiaaqqanut, viinninut aamma imifassanut online-kut neqeroorutit"
Neqeroorut Bonussimi ilaasortanut atuutissasoq Pisiffiup ilisimatitsissutigaa.
Pisiffimmit taamatut neqerooruteqartitsisoqarnera peqqinnissamut naalakkersuisup Agathe Fontainip pakatsissutigaa. Naalakkersuisoqarfiup pisortaata Tine Parsip Sermitsiaq.AG-mut ilisimatitsissutigaa, Pisiffiup neqeroorutaa unitsinneqartariaqartoq.
Imigassamut inatsisissaq
- Imigassanut aalakoornartortalimmut inatsit marsip aallaqqaataani atuutilertussami allaqqavoq pisiniarfiit tamakkuninnga neqerooruteqaqqusaanngitsut, Tine Pars Sermitsiaq.AG-mut mailimik allappoq.
Pisiffiup neqeroorutaa marsip aallaqqaataanit unioqqutitsinerulissasoq Naalakkersuisoqarfimmit isigineqarpoq.
Pisiffimmut maili nassiunneqarpoq
- Inatsit suli atuutilinngimmat suli aalajangerneqanngilaq taamatut neqerooruteqarneq politiilersuunneqassanersoq, nangipporlu:
- Inatsisit malinneqarnissaat pillugu Naalakkersuisoqarfik Pisiffimmut mailimik allagaqarpoq, ilisimatitsissutigineqarpoq.
Naalakkersuisoqarfimmik oqaloqateqartoqartillugu Pisiffik pisoq pillugu Sermitsiaq.AG-mut oqaaseqarusunngilaq.