Pisiffik sinneqartooruteqarujussuartoq
Nunatsinni pisiniarfiutileqatigiiffissuarni namminersortutuaq Pisiffik 59 millioner koruuninik sinneqartooruteqarpoq
Pisiffiup pisortaanera Per Steen Larsen Sermitsiaq.AG-mut mail-ikkut naammagisimaarinnilluni allappoq pisiniarfiutileqatigiiffissuaq ukioq manna angusarissaarluarsimasoq.
Pisiffik 2014-imi 958 millioner koruuninik kaaviiaartitaqarpoq, kaaviiaartitat 2013-imut sanilliullugit 1,3 procentimik ikileriarlutik. Nalikilliliinerit sioqqullugit angusat 58,93 millioner koruuniupput, tassa ukiup siulianit 0,8 millioner koruuninik ikinnerullutik.
Pisiffik 2014-imi pitsanngorsaasimavoq aammalu Kalaallit Nunaanni "siunissami pisiniarfiutuleqatigiiffimmut" aningaasaliissuteqarsimalluni. Pisiniarfiutileqatigiiffiup siuariartornissamut periuseq nutaaq saqqummiuppaa, taannalu 2015-imi piviusunngortinneqassaaq.
Ilaasortarpassuit
Ilaasortat klubbiat Bonusi Club 2014-ip naanerani illoqarfinni arfinilinni, Pisiffiup pisiniarfiuteqarfigisaani, pisiniartartuusinnaasut 96 procentii sinnerlugit ilaasortaqarpoq.
2015-imut isumalluartoqarluarpoq, pisortaq allappoq:
– Niuernikkut kinguariartortoqaraluartoq naatsorsuutigaarput kaaviiaartitat amerleriassasut, tamatumunngalu kvartali siulleq takussutisseereerpoq, pisortaaneq Per Steen Larsen nalunaarummini allappoq.