Skip to main content

Pisiffik meeqqanik illersuiniarluni iliuuseqartoq

Suliffeqarfiup isumaginninnikkut akisussaaffimmi ilaatut, Pisiffik meeqqanut malittarisassanik atuutsitsilersippaa, ilaatigut inuit attaveqaqatigiittarfiisigut imigassanik neqerooruteqartarunnaarsillugu.

Pisiffimmit ilisimatitsissutigineqarpoq, suliffeqarfik ukiuni kingullerni innuttaasut peqqinnerulernissaannut inuiaqatigiinnilu atugarissaartoqarnerulernissaanut peqataarusulluni suliaqarsimasoq, maannalu "Meeqqanut malittarisassat" tigussaasut atuutsinneqarnialersut.

- Kalaallit Nunaanni suliffeqarfiit annersaasa ilaattut inuiaqatigiinnut akisussaaffeqarpugut, pingaartumik meerartatsinnut inuusuttortatsinnullu. Ilisimagitsigu meeqqat inuusuttullu assersuutigalugu ikittaatinik pisiaqaqqusaannginnerannut inatsiseqanngitsoq nammineerluta tamana iliuuseqarfisariaqarparput, Pisiffimmi nittarsaassisarnermut pisortaq Tina Hansen Sermitsiaq.AG-mut oqarpoq.

Pisiffimmit Brugsenimillu ukiualuit matuma siornatrigut aajangerneqarsimavoq, meeqqat inuusuttullu ikittaatinik ikittaatinullu gassinik pisiaqartassanngitsut.

- Tamanna inissaminiippoq – aamma ajunngitsup tungaanut alloriarneruvoq - inuit attaveqaqatigiittarfiisigut imigassamik nittarsaassissaarnissamik maanna aalajangersimanerput, Tina Hansen oqarpoq.

Allat isumassarsitissinnaanerannik neriuuteqartoq

Taassuma nassuiaatigaa, meeqqat inuusutullu inuit attaveqaqatigiittarfiinik atuinerpaasartut, suliffeqarfimmillu tunisassianik imigassartalinnik nittarsaassisarnermi taakku eqqorneqarnissaat soqutigineqanngitsoq.

- Akerlianik meeqqat inuusuttullu peqqissusaannik siuarsaallutik nuannartitsiniarlutillu suliniuteqartunut tapersersuivugut. Neriuutigaarput iliuuseqarnitsigut suliffeqarfiit allat uagutsitut iliornissamut isumassarsitissinnaallutigit, taanna oqarpoq.

Meeqqanut malittarisassat sulisut peqataaffigissavaat, taakku peqatigiillutik akisussaaffimmik malinninnissaq isumagisassavaat. Tina Hansenip ilisimaarilluarpaa, sulisut malittarisassanik malinninnissamut suliaqartariaqartut, isumaqarporli tamanna akilersinnaalluassasoq.

- Soournami immikkut suliaqartoqartussaavoq, taamatulli iliorneq eqqortuuvoq, taanna oqarpoq.

Malittarisassat: 

Pisiffik innuttaasut peqqinnerulersnissaannut inuiaqatigiinnilu atugarissaarnerulertoqarnissaanut peqataarusuppoq.

1. Taamaammat inuusuttut 18-it inorlugit ukiullit Pisiffiup pisiniarfiutaanni ikittaatinik puulinnik piseqqusaanngillat.

2. Taamaammat inuusuttut 18-it inorlugit ukiullit Pisiffiup pisiniarfiutaanni ikittaatinik piseqqusaanngillat.

3. Taamaammat inuusuttut 18-it inorlugit ukiullit Pisiffiup pisiniarfiutaanni lattergasit patronissaannik piseqqusaanngillat.

4. Taamaammat meeqqat 16-it inorlugit ukiullit atuarnerup nalaani Pisiffiup pisniarfiutaanni energidrikkinik piseqqusaanngillat.

5. Meeqqat inuusuttullu 18-it inorlugit ukiullit inuit attaveqaqatigiittarfiinik atuinerpaasarput (Facebook, Instagram aamma Twitter), tamannalu tunngavigalugut taakku aqqutigalugit imigassamik nittarsaassisarunnaarpugut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER