Pisiffik ajornartorsiutaasinnaasumik paasisaqartoq
Kalaallit Nunaanni pisiniarfiit nerisassaarniarfiillu annersaat Pisiffik A/S ukiumoortumik naatsorsuusiamini suliffeqarfimmut ulorianartorsiortitsisinnaasumik nutaamik paasisaqarsimavoq.
Pisiffiup ukiumoortumik naatsorsuutimini 42.3 millioner koruuninik sinneqartooruteqarluarsimanini påskinngilaatsiartoq saqqummiuppaa, aqutsisulli naatsorsuutinut atatillugit ataasiakkaanik niueruteqartarnermi marlunniit pingasut tungaannut ajornartorsiuteqartoqalersinnaanera paasisimavaat.
- Coronap tuniluunneranut atatillugu siunissamut naatsorsuutigisat qularnartoqarnerisa saniatigut Pisiffiup ataasiakkaanik niueruteqartarnera ingerlatseqatigiiffiup ingerlanneqarneranut arlalitsigut sunniuteqarsinnaasumik ulorianartorsiortinneqarpoq, aqutsisut ukiumoortumik naatsorsuutini allapput.
Qarasaasiakkut pinerluuteqartarneq
Aqutsisut digitalimik atuinerujartuinnarneq siullermeelutik aatsaat ilannguppaat, atuinerujartuinnarneq ”it-kkut atortorissaarutit ajoquteqalernerannik kiisalu qarasaasiakkut pinerluuteqartoqarneranik nassataqarsinnaasoq”.
Pissutsit allat marluk Pisiffimmi aqutsisut ilungersunarnerpaatut isigisaat aamma kingullemik naatsorsuusiortoqarmat oqaasertalerneqarsimasut ukuupput:
Pilersuinerup isumannaatsuuneranut sunniutaasinnaasut
Nunat tamalaat internetsikkut niuernerminnut Kalaallit Nunaat ammaatissappassuk nerisassaanngitsunik pisiniariaatsip allanngortinneqarnissaa.
Pisiffik internetsikkut niuertarnermut atatillugu netsikkut pisiniarfiutiminut aningaasaliissuteqangaatsiarsimavoq, qarasaasiakkut pinerluttoqarsinnaaneranut mianernartumik.
Arfinilinnit sisamat saassunneqarsimasut
Kukkunersiuisarfik PwC, suliffeqarfiit arlallit sinnerlugit ukiumut misissuisartoq, naapertorlugu Danmarkimi suliffeqarfiit quliugaangata arfinillit 2020-p ingerlanerani qarasaasiatigut pinerliiffigineqarsimapput.
- Peqatigitillugu suliffeqarfiit quliugaanta sisamat oqaatigisarpaat, saassussinermi suliffeqarfitsik ajoquserniarneqarsimasoq, PwC 2020-mi decembarip qaammataani misissuisimasoq allappoq.