Pisassinniaqatigiit piumasartik pivaat

Uummannami aamma Qeqertarsuup Tunuani qaleralittassat ullumi ataasinngornermi amerlineqarput.

Obs. Nal. 9.00 Allaaserisami qulequtarineqartoq qallunaatuumiit kalaallisut nutserneqarsimasoq naqqinneqarpoq, oqaaseq pisassinniaqatigiit atorneqalerluni.

Aqutsiveqarfik Uummannamut qaleralittassiissutit 400 tonsit kiisalu Qeqertarsuup Tunuani akuersissutaatillit ukiup sinneranut pisassiissutaasut sinneri 176 tonsit aalisarsinnaalerpaat.

Namminersorlutik Oqartussat tusagassiutinut nalunaarummi allapput.

Saqqumilaanngitsumik politikkikkut isumaqatigiinneq

Taamaasilluni Kim Kielsenip (S) Karl-Kristian Krusemut isumaqatigiissutaa maanna eqquutsinneqarpoq.

Ullumimit atuutilerpoq

Uummannami pisassiissutit angallataatilinnut umiatsiaararsortunullu assigiimmik qassutinik aalisarsinnaassanngitsut ilimatitsissutaavoq.

- Ilassutigineqartunit 267 tonsit umiatsiaaqqanik aalisarneqassapput, 132 tonsit aalisariutinik aalisarneqassallutik. Aqutsiveqarfimmut Uummannamut umiatsiaaqqanut 2019-imut qaleralittassiissutigineqartut novembarip 8-anni 2019-imi tamakkerneqarlutik aalisareerput, ullormi tassani aalisarneq unitsinneqarluni. Naalakkersuisut aqutsiveqarfimmut Uummannamut 2019-imut qaleralittassat 9.900 tonsinik TAC-ilerpaat, akuerineqarsinnaasumik aalisarneqarsinnaasut. Ilisimatuussutsikkut siunnersuutigineqartut 5.800 tonsiullutik, nalunaarutigineqarpoq.

Ullumikkumiit umiatsiaaqqamik aalisartutut aqutsiveqarfik Qeqertarsuup Tunuani akuersissutaatillit ukiup sinneranut pisassiissutaasut sinneri 176 tonsit aalisarsinnaalerpaat. Naalakkersuisut aalajangerput pisassiissutit sinneruttut ningittagaannarnik aalisarneqassasut.

- Aalisarneq pillugu ineriartorneq Naalakkersuisoqarfimmit nakkutigeqqissaarneqassalluni, nalunaarutaavoq.

Powered by Labrador CMS