Pisassiissutinik qaffaanermut nassuiaatigineqartoq atorsinnaanngilaq.
Naalakkersuisut naapertorlugit Nuummi Maniitsumilu nipisattassiissutinik qaffaanermi siorna pisarinngitsoorneqarsimasut nuuginnarneqarsimapput. Inatsilli malillugu tamanna pisinnaanngilaq.
Naalakkersuisut maajip aqqaneq-aappaanni aalajangeramik Nuummi Maniitsumilu nipisatttassiissutit 204 tonsinik qaffanneqassasut nassuiaatigaat, KNAPK-p pisassiissutinik qaffaaqqusisimanera, tamannalu 2019-imi pisarinngitsoorneqarsimasut 204 tonsit ukioq mannamut nuunneqarnerannut tunngaviusoq.
Inatsilli naapertorlugu, nipisanniarneq pineqartillugu ukiup siuliani pisarinngitsoorneqarsimasut nuunneqarsinnaanngilluinnarput.
Aalisarnermut tunngatillugu inatsiseqarpoq, pisassiissutinik nuussisoqarsinnaaneranut aalajangersagartalinnik. Nipisanniarnermulli tunngatillugu nalunaarummi ukiup siuliani pisarinngitsoorneqarsimasunik nuussisoqarsinnaaneranik allassimasoqanngilluinnarpoq. akerlianik kinguppanniarnermut qaleralinniarnermullu tunngatillugit nuussisoqarsinnaaneranik aalajangersagaqarpoq. Tamanna Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaanni nr. 8, 8. april 2016-imeersumi erseqqissumik allassimavoq.
§ 7.
Imm. 2. Raajarniarnermi qaleralinniarnermilu aalisariutaatileqatigiiffiup ukiumoortumik pisassiissutinik tamakkerlugit aalisarsimanngitsup qinnuteqartoqarneratigut ukiup siuliani pisarineqanngitsut amerlaqataannik ukiup tulliani ukiumoortumik pisassiissutit amerlineqarnissaannik akuerineqarsinnaavoq. Raajarniarnermi pisassiissutit nuunneqartut kingusinnerpaa-mik 30. april pisarineqarsimassapput qaleralinniarnermilu kingusinnerpaamik 1. juli pisarineqarsimassallutik.
Nipisannut tunngatillugu tamanna atuutinngitsoq
Nalunaartut pineqartoq nipisannut atuutinngilaq. Nipisanniarneq pillugu Namminersorlutik Oqartussat nalunaarutaanni nr. 2, 2. februar 2016-imeersumi allassimavoq, ukiunut ataasiakkaanut pisassiissutilssat aalisarnermik ingerlatsinissaq pillugu Naalakkersuisut akuersissutaat naapertorlugu aalajangersarneqartassasut.
Aalisarnermik ingerlatsinissaq pillugu pilersaarummi allassimavoq, Pinngortitaleriffimmi biologit inassuteqaataat naapertorlugit TAC ukioq ataasiakkaarlugu aalajangersarneqartassasoq. Pinngortitaleriffimmit inassutineqarsimapput 1159 tonsit. Qaffaasoqarmalli TAC 1363 tonsinngorsimavoq. Siorna pisarinngitsoorneqarsimasut nuunneqarnissaannut inatsisitigut tunngavissaqanngimmat, ingerlatsinissamut pilersaarut malinneqarsimanngilaq.
Naalakkersuisut maajip aqqaneq-aappaanni nipisattassiissutissat qaffanneqarnissaannik suliaqaramik, KNAPK-mit qaffaaqqusisoqarsimanera tunngavigineqartoq Aalisarnermut, Piniarnermut Nunalerinermullu Naalakkersuisoqqrfik ilisimatitsivvoq. KNAPK-p pisassiissutinik qaffaasoqarnissaanik siunnersuutip tusarniaassutigineqarneranut akissuteqaammini pisassiissutinillu qaffaasoqarnissaanik qinnuteqaammini pingaartillugu oqaatigisimavaa, pisassiissutit qaffangaatsiarneqartariaqanngitsut, aamma aqutsiveqarfinni allani pisaringitsoorneqarsimasut nuunneqarnissaat pitsaanerpaassasoq.
Qaffaaneq pillugu amerlanerusunik apeqqutissaqartoqarlersoq
Kisianni sooruna Nuummi Maniitsumilu pisassiissutit 104 tonsinik qaffanneqartut, aamma siorna pisarinngitsoorneqarsimasunik nuussisoqarneranik innersuussinermut inatsit sna tunngavigineqarpa?
Sermitsiaq,AG-mit pisassiissutinik qaffaanissamut isummernissamut tunngavissiaq takorusunneqarsimagaluarpoq, pappialalli takunnissinnaanermut attuumassuteqaratik Naalakkersuisut isummernissaannut tunngavissiatut taaneqartarmata pissarsiassaasimanngillat.
Naalakkersuisut Siulittaasuat Kim Kielsen oqallinnermut ilanngunneqarpoq, pisassiissutinik suli qaffaasoqanngitsoq umiatsiaminik attartortitsisimasoq paasineqarmat. Inatsisartut Kukkunersiuinermut Ataatsimiititaliaata, maajup aqqaneq-aappaani pisassiissutinik qaffaasoqarnerani siulittaasup attuumassuteqarpallaarluni tunuartersimasinnaagaluarnera misissuiffigalugu aallartippaat.