Pisassiisoqareersoq: Naalakkersuisut qilalukkanik qaqortanik avammut annissisarnermik unitsitsisariaqalersut
Tunumut pisassiisoqarnerata kingorna qilalukkanit qaqortanit tunisassiat avammut anninneqarsinnaajunnaarput. Kitaanit avammut annissisoqarsinnaalissanersoq Naalakkersuisut misissorniarpaat.
Inatsisartut ukiakkut ataatsimiinnermi aalajangerput, Naalakkersuisut Tunumi neqissaqarniarneq eqqarsaatigalugu qilalukkanik qaqortanik pisassiissuteqassasut.
Taama iliuuseqarnerup maanna kingunerilerpaa, qilalukkanit qaqortanit tunisassianik Danmarkimi ilaquttanut ikinngutinullu nassiussisoqarsinnaajunnaarnera, soorluttaaq takornariat qilalukkanit qaqortanit tunisassianik avammut annissisinnaajunnaartut, nunatsinni piniarneq piujuartitsisuusutut nalilerneqarsinnaajunnaarmat.
Tamatumunnga pissutaavoq Tunumi qilalukkat qaqortat Svalbardip eqqaani qilalugaqatigiinnit nungutaanissamik aarlerinartorsiortunit pisuusinnaanerat.
Naalakkersuisut tusagassiuutitigut nalunaarummi taama paasissutissiipput:
- Qilalukkanit qaqortanit tunisassiat taamaallaat pisat uumasoqatigiinnit piujuartitsiviusumik atorneqartunit pisuusut uppernarsarneqarsinnaappat avammut anninneqarsinnaapput eqqunneqarsinnaallutillu.
- Ajuusaarnartorujussuuvoq
- Tassami Kangiani qilalukkanik qaqortanik teknikkikkut pisassiinerup qilalukkat qaqortat tamarmiusut amerlassusiinut sunniuteqarnerlussinnaanera mattunneqarsinnaanngilaq, Naalakkersuisut allapput, pisorlu ajuusaarnartorujussuunerarlugu:
- Kalaallit Nunaanniit qilalukkanit qaqortanit tunisassianik avammut annissisarnermik unitsitsigallarneq Naalakkersuisunut ajuusaarnartorujussuuvoq. Tamanna Naalakkersuisut naalakkersuinikkut kissaataannut uniuuppoq.
- Nunatsinni innuttaasut qilalukkat qaqortat neqaannik ilaquttaminnut ikinngutinut minnerunngitsumillu napparsimallutik Danmarkimiittunut nassiussisinnaanissaat Naalakkersuisunit pingaartinneqarpoq.
Naalakkersuisut nunat tamalaat akornanni maleruagassat pissutigalugit qilalukkanit qaqortanit tunisassianik avammut annissisarnermik unitsitsigallarnissamut pisussaaffilerneqarput, tamanna pissutigalugu Naalakkersuisut, Kitaani uumasoqatigiinnit piujuartitsiviusumik atorneqartuniit qilalukkanit qaqortanit tunisassianik avammut annissisarnermik ammaasseqqissinnaanissamut periarfissanik misissuillutik aallartipput.