Pinngortitamik nuannarisalik: Kapisilinnut ATV-nut aqquserniorniarneq taamaatiinnarsiuk
Kim Godtfredsenip Timi Asimeersup aqquserniornissamik pilersaarut politikkikkut takorluugaannaasorivaa, inassutigalugulu aningaasat meeqqat inuusuttullu ajornannginnerusumik pinngortitaliartarnissaannut taarsiullugu atorneqassasut
Kommuneqarfik Sermersooq Nuummiit Kapisilinnut ATV-nut aqquserniornissamik pilersaaruteqarnermini nersualaarneqarsimavoq. Aammali inoqarpoq tamatuma isumassarsialaatsiannginneranik isumaqartunik.
Kinngullertut taaneqartunut Kim Godtfredsen ilaavoq, taanna Timi Asimimi, pinngortitami sammisaqartitsisarneq aqqutigalugu inuttut ineriartornissamut meeqqanut inuusuttunullu neqerooruteqartarnermi aqutsisuuvoq.
Tamannarpiarlu pissutigalugu Kim Godtfredsen isumaqarpoq, Kapisilinnut ATV-nut aqquserniortoqarsinnaaneranik misissuinissamut - piviusorsiunngitsutut isigisaminut taarsiullugu aningaasat allanut atorneqartariaqaraluartut.
- Ukiut aappaassaanik ATV-nut aqquserniarniarneq pillugu – takorluugaannaasumik, pinngortitami inuusugut, sisorartarsuusugut atuisuusugullu saqqummiussiffigineqaratta ileqimasaartuinnarpugut, taanna tusagassiutinut nalunaaruteqarnermi allappoq.
- Politikkerit Kapisillit tungaanut pisuttuartarfimmik atuisartut aperisimavaat? Qamuteralannik atuisartut klubbiat aperisiuk qummut ammullu ingerlaniarneq qanoq ajornartigisinnaasarnersoq. ATV-nut aqqutip sineriak, milliardit nalinginut qaqqamik qaartiteriffiusussaq malinniarpaa?
Kim Godtfredsenip aamma oqaatigaa, sermit qaqqallu ATV-nut aqquserniornissaq ajornartorujussuutissagaat.
- Taamaatiinnarsiuk! Nukisi meeqqat inuusuttullu ajornannginnerusumik pinngortitamukartarnissaannut, Quassussuup tunuanukartarnissaannut atorsigit. Issialluni majuartaatilioritsi ukioq naallugu atorneqarsinnaasumik. Meeqqat atuartut nutaamik tammaarsimaartarfiliuussigit, meeqqallu pinngortitamukartarnissaannut amerlanerusunik periarfissaqalersissigit, taanna kommunimi politikkerinut kaammattuivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...