Pinngortitaleriffiup sumut attuumassuteqanngilluinnarnera apeqquserneqarpoq

Pinngortitaleriffiup sumulluunniit attuumassuteqanngilluinnarnera Demokraatinit Steen Lyngep apeqquserpaa. Ilisimatusarnermut naalakkersuisumit apeqquserneqartut ilumuunnginnerarneqarput

- Pinngortitaleriffik pillugu inatsimmi piumasaqaateqanngilaq allanik aningaasaliisinnaasunik suleqateqarneq sunik qanorlu tunngaveqarsinnaanersoq pillugu. Tamanna Pinngortitaleriffiup arlaannaannulluunniit attuumassuteqannginnissaanut ernumatitsilersinnaavoq eqqarsaatigalugu Pinngortitaleriffiup Naalakkersuisunut innersuussuteqartarnera, Steen Lynge Naalakkersuisunut allakkatigut apeqquteqaateqarnermini tunngaviilluni allappoq.

Aningaasaliissuteqartoqarneq ajorpoq

Pinngortitaleriffik soqutigisaqatigiiffinnit aningaasanik pissarsineq ajortoq ilisimatusarnermut naalakkersuisumit Erik Jensenimit naqissuserneqarpoq.

- Pinngortitaleriffik soqutigisaqaqatigiiffinnit, isummanik allanngortitsiniarnermik ingerlatsisuusunit (WWF, Greenpeace il.il.) tapiissutinik tigusineq ajorpoq, taamatullu tamatumunnga kajumissaarinertaqanngitsumik neqeroorutit itigartinneqartarput, Erik Jensen akissuteqaammi allappoq.

- Pinngortitaleriffiup suliatigut arlaannaannulluunniit attuumassuteqannginnera nunani tamalaani ilisimatusartunit tamatumalu saniatigut inuiaqatigiinnit naliliiffigineqartarpoq. Pinngortitaleriffimmi ilisimatusartut ilisimatusarnikkut perulluliorsimannginnerannut ilisimatusarnikkut tunngavissaq uppernarsarneqarsimasoq sullivimmit pigineqarpoq. Aamma sulliffiup sulinerani isummersuuteqartoqartarneranut takussutissanik peqanngilaq, Erik Jensen naqissusiivoq.

Powered by Labrador CMS