Pinngortitaleriffimmi suliniut millioninik tapiiffigineqartoq
Novo Nordisk Fonden Kalaallit Nunaanni ilisimatusarnermik ingerlatitseqqiisarnerup ineriartortinnissaanik Pinngortitaleriffimmi suliniummut 4 millioner koruuningajanngip aningaasaliissuteqarpoq. Suliniutit allat marluk Kalaallit Nunaannut attuumassuteqartut aamma tapiiffigineqarput.
Danmarkimi Novo Nordisk Fonden ilinniartitaanerup ingerlatitseqqiisarnerullu iluanni suliniunut 32-nut 100 millioner koruuninik aningaasaliissuteqaqqammerpoq.
Aningaasaateqarfik tusagassiuutitigut nalunaarummi taama paasissutissiivoq.
Suliniut tapiiffigineqartut ilaat tassaavoq, Pinngortitaleriffimmi ukiuni pingasuni suliniut Attavik, 3.943.192 koruuninik tapiissuteqarfigineqartoq.
- Pinngortitaleriffik suliniut taanna aqqutigalugu Kalaallit Nunaanni ilisimatusarnermut tunngasunik ingerlatsitseqqiisarnermik ineriartortitsiniarpoq.
- Silap pissusiata allanngoriartorneri, uumasoqassutsip assigiinngiiaassusia aamma pisuussutinik uumassusilinnik piujuartitsisumik iluaqutiginninneq pillugu ilisimasat innuttaasunut siammarterneqassapput videot, podcastit, aalasuliat aamma allaaserisat pissarsiariuminartut aqqutigalugit, suliniutip allaaserineqarnerani allassimasoqarpoq.
'Into the water' aamma 'High5Girls 2.0. '
Suliniutit allat marluk aamma Kalaallit Nunaannut attuumassuteqarput. Taakkua tassaapput 'Into the Water', tamatumanilu aningaasaateqarfik Hansen og Pedersen Film og Fjernsyn ApS-imut ukiut pingasut ingerlaneranni 3.913.350 koruuninik tapiissuteqassaaq:
- Piviusulersaarutitut filmiliap Into the Icep nanginneratut ilitsersuisoq Lars Henrik Ostenfeld silap pissusiata allanngoriartornerani qitiusoqarfimmut aggersaavoq, tassanilu ilisimatusartunit sermersuup aakkiartortup Issittup Imartaanut qanoq sunniuteqarnera misissorneqarpoq. Immap iluatigut robotteknologii nutaaliaalluinnartoq iluaqutigalugu Kalaallit Nunaata sermersuata naqqanut immap qaavaniit itisoorsuarmut angalasoqarpoq, suliniut pillugu allassimasoqarpoq.
Suliniut 'High5Girls 2.0.' 2.000.000 koruuninik tapiiffigineqarpoq, nutaatullu suliniut Kalaallit Nunaanni 2024-mi ilisaritinneqassaaq:
- High5Girls Ilisimatuussuseq, Inuttut imminut tatigineq Ataqatigiinnerlu immikkut pingaartitaralugit pinngortitami ilisimatuussutsip iluani qulequttat atorlugit niviarsiaqqanut 13-19-inik ukiulinnut anaanamut/panimmut aaqqissuussinernik, bootcampsinik, pisoqartitsinernik ingerlatitseqqiinernillu pilersitsissaaq, suliniummi allassimasoqarpoq.