arferit
Pinngortitaleriffik: Tunup imartaani qilalukkanik qaqortanik takuit?
Pinngortitaleriffiup qilalukkat qaqortat Tunup imartaani takussaanerulersimanerat nalunaarsorsimavaat. Biologit maanna innuttaasunit ikiorneqarniarput
Tunup imartaani qilalukkanik qaqortanik ukiuni kingulliunerusuni takusoqartalersimavoq, tamannalu nutaajuvoq, Pinngortitaleriffik oqaluttuarpoq.
- Ukiuni siusinnerusuni qaqutigorsuaannaq qilalukkat qaqortat tappavani naammattoorneqartarsimammata. Siusinnerusukkut nalinginnaasumik isumaavoq Tunup imartaani immikkoortunik qilalukkanik qaqortaqatigiinnik peqanngitsoq, Pinngortitaleriffik ilisimatitsivoq.
Atuaruk: Arfernut nuttanngitsunut piniaqqusinnginnermik atsiornernik katersineq
- Taamaattumik soqutigisupilussuuarput Tunup imartaani qilalukkanik qaqortanik naammattuuisarnernut tunngassuteqartunik ilisimatinneqartarnissaq. Assersuutigalugu qassutini qilalukkamik qaqortamik pisaqartoorsimagaanni tassanngaanneersumit misissugassanik Pinngortitaleriffimmiit pissarserusuttorujussuussaagut (soorlu isai, kigutai mattamernganeersunillu).
Siunissami immaqa qilalukkanik qaqortarniartoqarsinnaasoq
Misissukkanik taama ittunik iluaquteqarluni paasiniarneqarsinnaassaaq qilalukkap qaqortap pisarineqartup suminngaanneernera. Ilisimanarnerpaajuvoq immaqa Svalbardiminngaarneersuunissaat, taavanimi qilalukkanik amerliartortunik qaqortaqatigeeqarpoq – ilumulli taamaassinnaanera uppernarsaasimatigani oqaatigiuminaatsinneqarpoq.
Tunumi siunissami qilalukkat qaqortat piniagaalissappata, biologit Namminersorlutik Oqartussallu paasissutissat amerlanerusut pisariaqartippaat.
Ilisimatusartoq attavigiuk
Pinngortitaleriffimmeersut aasarmanna 2016 aammalu aappaagu 2017-imi arfernik kisitsinernik ingerlataqartussaapput, tassanilu biologit aamma qilalukkanik qaqortanik takunninniarnermut isitik ammatilluarniarpaat.
Pinngortitaleriffiup biologia Mads Peter Heide-Jørgensen attavigineqarsinnaavoq, oqarasuaat +45 21833827.
Arferit pillugit allaaserisat tamaasa atuakkit