Pinngortitaleriffik piniartunik qilalukkanut qernertanut tunngatillugit ilisimasalinnik ujaasisoq
Ittoqqortoormiit avataanni qilalukkat qernertat apriilip maajillu qaammataanni kisinneqassapput. Piniartut ilisimasaat kisitsinissap pilersaarusiorneranut kisitsinermullu atorneqassapput
Pinngortitaleriffimmit qilalukkanik qernertanik, Ittoqqortoormiit avataanni 85.000 kvadratkilometerisut annertutigisumi apriilip maajillu qaammataanni kisitsisoqarniarpoq.
Tassunga atatillugu najukkami innuttaasut kaammattorneqarput ilisimasaminnik taperseeqqullugit.
- Ittoqqortoormiit avataanni aatsaavissuaq ukiukkut misissuisoqartussaammat taamaattumik piniartut allallu soqutigisaqaqatigiit paasisaqarfigerusuppagut ilisimasaminnillu avitseqatigerusunneraatigut kisitsitinnatalu pilersaarusiornissatsinnut kisitsinerillu piviusunngortinnissaannut atorsinnaasatsinnik oqaasissaqarnersut paaserusoqaarput. Assersuutigalugu kisitsinissatsinnut tunngatillugu sumiiffinnut piffissamulluunniit pingaaruteqarsinnaasunut tunngasunik paasissutissiisoqarsinnaanera tikilluaqquarput, Pinngortitaleriffik nittartakkamini allappoq.
Qilalugaqarfinnit allaneersuusinnaasut
NAMMCO-p ilisimatuussutsikkut ataatsimiitsitaliaata innersuussutigaa, Ittoqqortoormiut avataanni april-maajimi kisitsisoqassasoq. Kisitsiffiussaaq imaq sikuinneq ajortoq tamarmi aammalu qilalukkat qernertat ukiiffigisartagaat Ittoqqortoormiut Kangerlussuullu akornanniittoq. Kisitsinerlu aamma Liverpool Landimi Carlsberg Fjordimilu aamma ingerlanneqassaaq, sineriammiillu avammut 150 km tikillugit kisitsisoqassaaq.
Kisitsinissamut tunngaviuvoq, qilalukkat qernertat Ittoqqortoormiit avaannatungaani maajip juunillu qaammataanni pisarineqartartut, Kangerlussuup kujataata kitaattungaani kingusinnerusskkut pisarineqartartunut sanilliullutik qilalugaqarfinnit allaneersuusinnaanerat.
Pisassiissutit qaffanneqarnissaat naatsorsuutigineqanngitsoq
Qilalugaqarfinnit allaneersuneersorisat aasakkut nunap eqqissisimatitap avataaniittumut avannamukartarput.
- Qilalukkat qernertat ukiuunerani najuuffigisaminniit aasakkut piniartarfinnukarnissaat naatsorsuutigineqanngilaq, ilimagineqarami qilalukkat qernertat ilaat nunap eqqissisimatitap tungaanut Ittoqqortoormiunut qanillinatilluunniit ingerlaarnissaat.
- Kisitsineq amerlanernik pisassiinernik kinguneqassasoq taamaattumik naatsorsuutiginngilarput. NAMMCO-lli uumasut timaasa sannaanik misissuinerit, satellitsikkut malinnaanerit, uumasut tigusiffiginerini misissukkat inerneri, pisaqartuniit paasisat allallu aallaavigalugit, paasissutissat nutaat pissarsiarineqartut atorlugit paasissutissat siunnersuinissaminnut atussagaat naatsorsuutigaarput.
Twin otteri atorlu nalunaaquttap akunnerini 50-ini kisitsinissamut aningaasaliisoqarsimavoq.
Paasissutissaateqaraanni Pinngortitaleriffimmi attaveqatigiinnermi pisortaq Else Løvstrøm ellm@natur.gl imaluunniit oqar.: 361293 aqqutigalugit saaffigineqarsinnaavoq.