nunalerutit

Pinngortitaleriffik Kinami universitetimit qaammataasamit assilisanik nutaanik pissarsisoq

Nuummi Pinngortitalerifimmi biologit maannamit nunap assingi Kinamiut qaammataasaannit assilisat atorlugit qimerluualaarsinnaanngorpaat

Pinngortitaleriffik sapaatip-akunnerata kingulliup ingerlanerani Kinamit atorfilinnit ilisimatusartartunillu nuimasunit sisamamanit Kinap ilisimatusarnermut aamma teknologiimut ministeriaqarfianit, Beijing Normal Universitetimit aamma Shanghaimi nunalerinermut ilisimatusarfimmeersunit tikeraartoqaqqammerpoq.

Taakku ilisimatusartartut Kinameersut Nunatsinneersullu suleqatigiissutigimasaasa inernerat tunniukkiartorlugit maaniipput, tassalu Nunatta tamakkerluni qaammataasamiit assilinerinit assit.

Assit nalituut
Assilisat 108-nik amerlassusillit Landsat-8 qaammataasamit assilisanik taaneqartarput, taakkulu katiteraanni Nunarput tamakkerluni assilineqarsimalluni. Assiliisarnerit pipput qaammatini juli aamma august 2014-imi 2015-imilu, assillu maanna Pinngortitaleriffimmut tunniussimaneqalerput.

Qaammataasamit assilisat naammaginartumik pitsaassusillit pilersinniarnerat ajornakusoortuusinnaavoq. Sorpassuit iluatsilluarnissaat pisariaqarpoq, soorlu aamma sila assiliiniarnerup nalaani ajungittariaqartoq.

Atuaruk: Kalaallit Nunaata assinga digitali atorlugu nutarterneqalerpoq

Qaammataasaq nunarsuatsinnik kaajallaasarpoq ullut 16-it ingerlanerini, sarsunneratalu nalaani sila pitsaavallaarsimanngippat, tassa kisianni aamma ullorpassuit 16-it utaqqeqqilluni.

Qaammatasaamit assilisat Pinngortitaleriffik Oqaasileriffillu peqatigalugit suliarineqarput. Taaneqartup kingulliup nunap aqqisa eqqortuunissaat qulakkeertussaallugit.

Soqutiginninneq annertooq
- Assit uku Kalaallit Nunaannut inissaviannut tunniussinnaagatsigit nuannaarutigeqaarput. Aperisoqarsinnaavoq sooq aamma Kina nunap assinginik taama ittunik soqutiginninnersoq, Beijing Normal Universitetip Issittumi Imaanullu tunngatillugu ilisimatusarfeqarfiani pisortaq Xiau Cheng nassuiaavoq.

- Soqutiginnittorujussuuvugut, ingammik sermersuup aakkiartorneranik malinnaalluarnissarput pingaaruteqaqimmat, Kinammi imartaata qaffasissusia toqqaannartumik sunnersimaneqalereermat. Kinami qarsutsisarnerit misillerfigisalereerpagut. Aamma eqqarsaatigisassaraarput Kinap kangiatungaata nunap sinneranut sanilliullugu appasinnerusumiinnera. Nunarsuarput tamarmi ataqatigiippoq, taamaammallu Issittumi allangoriartuutit Kinamit soqutigineqarlutik malinnaaffigeqqissaarneqarput.

Atuaruk: Pinngortitaleriffik: Tunup imartaani qilalukkanik qaqortanik takuit?

- Nunap assingi CD-ertaalu pissarsiarisagut Pinngortitaleriffimmi ilisimatusartartut sulinerminni assersuutigalugu tuttunut nunallu pissusianik misissuinerminni tunuliaquttatut atortarsinnaassavaat, Pinngortitaleriffimmi paasissutissanik suliareqqiisartoq, GIS-manager, Karl Zinglersen oqarpoq.

Taama nunap assinginik tunniussaqarnermut atatillugu siunissami ilisimatusaatigineqarsinnaasunik suleqatigiissutigineqarsinnaasunillu allanik eqqartueqatigiittoqarportaaq. Kinamiit aallartitat ilaatigut imaata pissusianik aammalu immap sikuata siaruarsimaneranik ilisimatusaateqaqatigiissinnaanerit periarfissatut taavaat.

Naatitat misissuiffigineqarsinnaasut
Ilanngullugu aamma oqaluttuaraat Issittumi taartartumilu naatitanik naatitsiniartarnernik misilittakkatik: angalaqataasut ilaat Shanghai Academy of Agricultural Sciencesimeesoq, tassa Shanghaimi nunalerinermik ilisimatusarfimmeersoq ilisimatusartartoq, Qiang Zhou, taartumi issittumilu naatitanik naatitsisinnaanermik immikkut ilisimatusaateqarsimavoq.

Tassami Qalasersuarmi Kujallermi iluatsilluartumik naatitanik naatitsisarsimavoq – immaqaliaa ilisimasai aamma maani atorlusinnaasassarsuagut.

Powered by Labrador CMS