Pinngitsaalineqarluni atoqatigineqarsimanerit pingasut ullormi ataatsimi nalunaarutigineqartut

Pinngitsaalineqarluni atoqatigineqarsimanerit Sisimiuni Ilulissanilu nalunaarutigineqarsimapput.

Kalaallit Nunaanni Politiit sapaatip-akunnerata naanerani pinngitsaalineqarluni atoqatigineqarsimanerit pingasut pillugit nalunaarfigineqarsimapput. Nalunaarutit arfinginngornerup ualianiit sapaammi ullup-qeqqata siorna ilanngullugu tunniunneqarsimapput, pigaartut pisortaat Julie Senderovitz Bendtsen oqaluttuarpoq.

Kalaallit Nunaanni Politiit ukioq manna suliat taakku pingasut saniatigut pinngitsaaliilluni atoqateqarsimanerit 26-t maanna suliarivaat.

Sapaatip-akunnerata naanerani nalunaarut siulleq arfininngormat nalunaaqutaq 16.27 Sisimiuniit nalunaarutigineqarpoq, tassani arnaq inuusuttoq 20-t inorlugit ukiulik pinngitsaalisaalluni atoqatigineqarsimasutut nalunaaruteqarpoq. Kalaallit Nunaanni Politiit angut 20-kkunnik ukiulik pasillugu tigusarisimavaat.

Angut kingusinnerusukkut iperagaaqqippoq, suliamili suli misissuiffigineqartumi unnerluunneqarluni. Angut pinngitsuunerarpoq.

Angut 70-ikkunnik ukiulik unnerluutigineqartoq

Arfininngornerup ualiani kingusinnerulaartukkut Ilulissani pinngitsaalineqarluni atoqatigineqarsimaneq alla nalunaarutigineqarpoq. Tassani arnaq 30-kkunnik ukiulik allatut kinguaassiuutimigut atornerlunneqarsimalluni nalunaaruteqarsimavoq. Angut utoqqaq 70-ikkut aallartilaarnerannik ukiulik tigusarineqarsimavoq.

Pigaartut pisortaata ilisimatitsissutigaa, angut misissuiffigineqarsimasoq kingusinnerusukkullu iperagaasimasoq, Sulili suliami suli ingerlanneqartumi unnerluussaasoq.

Sapaatiummat ullup-qeqqata siornatigut nalunaaqutaq 09.57 Ilulissani nalunaaruteqartoqaqqippoq, tassani arnaq 18-inik ukiulik pinngitsaalisaalluni atoqatigineqarsimanerminik nalunaaruteqarpoq.

Angut killisiorneqassasoq

Suliami angut pasillerneqartoq 20-kkut aallartilaarnerannik ukioqarpoq, taanna ataasinngorpat inatsit tunngaviusoq malillugu killisiorneqassaaq, politiillu angutip tigummigallagassanngortinneqarnissaa piumasarisimavaat.

Pigaartut pisortaata nassuiaatigaa, suliani pissutsit assigiinngitsuuneri, pinngitsaaliilluni atoqateqarsimasutut pasillerneqartut tigummigallagassanngortinneqarnissaannik piumasaqartarnermut sunniuteqartartut. Pisimasumi matumani pinerluuteqarsimanerup sakkortussusaa pineqarpoq, Julie Senderovitz Bendtsen oqarpoq.

- Pinerluffigineqarsimasup ajoqusersimanerisa pinerluuteqarsimanerup sakkortusimanera uppernarsarpaat. Ajoqutit inuunermik ulorianartorsiortitsinngillat, Julie Senderovitz Bendtsen oqarpoq.

Qaqutigoortuusoq

Pigaartut pisortaata oqaluttuaraa, ullup ataatsip ingerlanerani pinngitsaalineqarluni atoqatigineqarsimanerit pingasut pillugit politiit nalunaarfigineqartarnerat qaqutigoortuusoq, politiilli ajoraluartumik taamatut ittunik suliassaqangaatsiartartut oqaatigalugu.

Ilulissani suliaq taamaalilluni ukioq manna pinngitsaaliilluni atoqateqarsimanerit pillugit suliat 26-ssaraat.

Pigaartut pisortaata tassunga atatillugu pinngitsaalineqarlutik atoqatigineqarsimasunut kaammattuutigaa:

- Pinngitsaalineqarluni atoqatigineqarsimanerit pillugit piffissaq ingerlareersoq nalunaarfigineqartarpugut. Nalunaaruteqarnissap artornarsinnaanera immaqalu sioorasaarneqarsinnaasimaneq paasilluarsinnaavarput.

Nalunaarutiginnipallannissaq pingaaruteqartoq

- Nalunaarutiginnittoqapallatsillugu uppernarsaatissat sukkanerusumik qulakkeersinnaavagut, pinerluuteqarsimasumillu tigusarinnilluta. Pinerluffigineqarsimasup pinerluuteqarsimasullu uffarlutik imminnut salinnginneranni DNA-p takussutissaanik allamilluunniit uppernarsaatissamik pissarsiniartussaavugut, Julie Sendrovtiz Bendtsen oqarpoq.

Pigaartut pisortaata erseqqissaassutigaa, politiit ulloq unnuarlu ammasartut, aamma pinngitsaalineqarlutik atoqatigineqarsimasut isumaginissaannut piareersimasartut.

- Kisimiikkusunngikkaanni inummut tatigisamut attaveqartoqarsinnaavoq, taannalu peqatigalugu nalunaaruteqariartorluni, taamaanngikkaluarpalluunniit pinerluffigineqarsimaneq isumagissaqqaarparput, pigaartut pisortaat oqarpoq.

Powered by Labrador CMS