Skip to main content

Pinngitsaaliisimaneq pillugu suliareqqitassanngortitaq aallartilersoq

Angut ukioq manna siusinnerusukkut Sermersuup Eqqartuussivianit inissiivimmiittussanngorlugu eqqartuunneqarpoq. Suliaq maanna Nunatta Eqqartuussiviani suliarineqassaaq, angutip unnerluussutit ilaannut pinngitsuutinneqarnissani kissaatigisimagamiuk.

Nunatsinni Eqqartuussiviup angut Sermersuup Eqqartuussivianit piffissaligaanngitsumik pineqaatissinneqarsimasunut inissiisarfimmiittussanngorlugu januaarimi eqqartuunneqarsimasoq, pillugu sapaatip akunnerani matumani ullut sisamat suliap suliareqqinneqarnissaanut atugassanngorlugit aaqqiiffigisimavaa.

Angut pinngitsaaliisimasutut, peqqarniitsumik persuttaasimasutut, inerteqqutaasumik pinngitsaaliisimasutut, meeqqanik inersimasuillu toqutsinissamik sioorasaarisimasutut, meeqqat pillugit pornografimik siammarterisimasutut aamma inunnut pisortatut sulisunut siorasaarisimasutut eqqartuussivimmit pisuutinneqarsimavoq.

Angutip eqqartuussut suliareqqitassanngortissimavaa, taassumalu illersuisuata Rune Wiborgip ilisimatitsissutigaa, angut unnerluussutinut nassuerutigisimanngisaminut pingitsuutinneqarusuttoq:

Illersuisup unnerluunneqartup paarineqannginnissaa anguniarpaa

- Pissutsit ilaannut tunngatillugu nassueruteqarnikuunera eqqarsaatigalugu, isumaqarpunga pillaasoqartariaqartoq, paarineqartariaqanngilarli, Rune Wiborg Sermitsiaq.AG-mut oqarpoq.

Eqqartuussinermi siullermi takunnissimasut 31-t apersorneqarsimapput, unnerluussullu annertooq tamatumunnga tunngaviusimalluni.

Unnerluussutigineqartut 26-usimapput, ukiullu pingasut sinnilaarlugit, 2016-imi maajip aallaqqaataanniit 2019-imi maajip 30-ata tungaanut pinerluuteqartarsimalluni.

Pinerluutigisimasai amerlanerit Nuummi pisarsimapput, ilaatigullu arnaq ataaseq arlaleriarluni sioorasaartarsimavaa.

Arlaleriarluni pinngitsaaliisimasutut unnerluutigineqartoq

Aangut arnamut sioorasaarisarsimasutut unnerluutigineqarnermi saniatigut, arnamik pineqartumik 2016-imi novemberip aallaqqaataaniit 2017-imi septemberip aallaqqaataata tungaanut arlaleriarluni pinngitsaaliilluni atoqateqartarsimasutut aamma unnerluutigineqarpoq.

Unnerluutigineqartut aamma ilagaat, pisortanut sulisunut kanngunarsaasarsimanera, ilaatigut unnerluutigineqartup politiit sioorasaartarsimavai.

Pisumi ataatsimi pineqartup politikommisæri ataaseq toqqosassisimavaa, pisumilu allai politeeq ataaseq ikilerlugu kiisimallugu.

Unnerluussisunit suli anguniarneqarpoq, angutip piffissaligaanngitsumik isertitsivimmiittussanngorlugu eqqartuunneqarnissaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER