pinngitsaaliineq
Pinngitsaaliisarnerit Kalaallit Nunaanni amerlanersaapput
Folketingimi ilaasortap Aaja Chemnitz Larsenip Inuit Ataqatiiginneersup FN-ip kisitsisai ernumanartoqartippai
Innuttaasut amerlassusaannut naleqqiullugu Kalaallit Nunaat nunarsuarmi pinngitsaaliisoqarnerpaasarpoq.
Aviisi akeqanngitsoq Metroxpress allappoq.
Danmarkimummi sanilliullugu Kalaallit Nunaanni 39-riaammik pinngitsaaliisoqarneranik nalunaaruteqarnerusarpoq.
Tamanna FN-ip nalunaarusiaani takuneqarsinnaavoq.
Iliuuseqartoqartariaqartoq
Ajornartorsiut pillugu Aaja Chemnitz Larsenip Inuit Ataqatigiinneersup inatsisinik atuutitsinermut ministerimut Søren Pindimut Venstremeersumut qaqilerniarpaa.
- Pinngitsaaliisoqarneranut kisitsisaatigineqartut amerlavallaarujusssuarput iliuuseqartoqartariaqalerlunilu. Pinngitsaaliinerit amerlanersaat nunaqarfinni pisarput, taakkunanilu kikkut tamarmik nalunngisariipput, Aaja Chemnitz Larsen oqarpoq.
Kalaallit Nunaani 132-riarluni ukioq kingulleq pinngitsaaliisoqarneranik nalunaaruteqartoqarpoq. Tasiilap immikkoortortaani katillugit 24-llutik.
- Kalaallit Nunaanni niviarsiaqqat amerlasuut ajoraluartumik atornerlugaanikuupput, illoqarfinni mikinerusuni nunaqarfinnilu amerlangaatsiartuullutik, p.hd.-itut ilinniagaqartoq Sidsel Karsberg oqarpoq.
Eqqartorneqartoq pillugu Kalaallit Nunaata avannaani ilisimatuussutsikkut misissuivoq.
Misissuinermini inuusuttuaqqat 269-it apersorpai, niviarsiaqqallu 14 procentii nukappiaqqallu 3,5 procentii atornerlugaasimasut paasillugu.