Pinngitsaaliilluni atoqateqarsimasoq: Angut parnaarussassanngorlugu eqqartuunneqartoq
Kalaallit Nunaata eqqartuussivianit najukkami eqqartuussiviup angut 50-t qiteqqullugit ukiulik, erngutarsiaminik ukiukitsumik arlaleriarluni kinguaassiutitigut atornerluisimanera pillugu piffissami killiligaanngitsumi tigummigallagassanngortinneqarnera attatiinnarneqassasoq, Kalaallit Nunaata eqqartuussivianit aalajangersarneqarpoq.
Obs: Allaaserisaq naqqinneqarpoq, suliami piffissami killiligaanngitsumi tigummigallagassanngortinneqarneq pineqarmat.
- Angut erngutarsiaminik 15-init ikinnerunngitsumik pinngitsaaliisimasutut Qaasuitsup Eqqartuussiviani pineqaatissinneqarsimavoq, tamanna pisarsimavoq niviarsiaraq qulit aqqanillillu akornanni ukioqarnerani. Tassunga ilanngullugu pineqaatissiissutigisimavaa, erngutassaminik pinngitsaaleeriaraluarsimanini kiisalu kanngutsaatsuliorlunilu kinguaassiuutitigut allatut iliuuseqartarsimanini, tassami meerannguaq iviangiisigut kinguaassiuutaasigullu attuualaartarsimagamiuk, tamannalu pisarsimavoq pinngitsaaliilluni atoqateqartarnerata nalaani, politiit tusagassiorfinnut nalunaaruteqarnerminni ilisimatitsipput.
Nassuerutiginnittoq
Angutip Nunatta Eqqartuussiviani killisiorneqarami pisimasut arlallit nassuerutigisimavai, taamaammat pineqaatissiissutissap sivisussusissaa Nunatta Eqqartuussivianit aalajangiiffigineqartussaasimavoq.
- Nunatta Eqqartuussiviata pineqaatissiissuteqarnermini pingaartissimavai, pinerliinerup sakkortussusaa, unnerluutigineqartup siusinnerusukkut pinerluuteqartarsimanera aamma inuttut qanoq ittuuneranik paasissutissat. Nunatta Eqqartuussivianit ilanngullugu pingaartinneqarsimavoq, angutip pineqartup pinerluuteqaqqinnginnissaa anguniarlugu angutip parnaarunneqarnissaata pisariaqarnera piumasaqaataaneralu, tusagassiorfinnut nalunaaruteqarnermi ilanngullugu oqaatigineqarpoq.
Niviarsiaqqamulli taarsiissutissatut aalajangiunneqarsimasut, Nunatta Eqqartuussiviata 200.000 koruuniniit 125.000 koruuninut appartippai.
Unnerluussisoq naammagisimaarinnittoq
- Eqqartuussinermi inerneritinneqartoq naammagisimaarpara, pineqaatissinneqartp pinerluutigisimasai ilungersunarluinnartut eqqarsaatigalugit”, unnerluussisutut fuldmægtigi Line Thornberg oqarpoq.