Pinnersartittarfik tillinniarfigitittoq
Pinnersarnermut timimullu atortut, pinnersaanermilu atortut pinnersartarfimmit arfininngornerup ullaassaani tillinneqarsimapput. Tillinniarneq pillugu ilisimasalik, paasissutissanilluunniit suliap naammassineqarnissaanut iluaqutaasinnaasunik tunniussisoq aningaasanik akilerneqarumaartoq, piginnittoq ilisimatitsivoq.
Pinnersartarfimmik Beauty by U-mik piginnittoq Ulla Lynge Heilmann Nuukullammi pinnersartarfimminut arfininngornermi ullaakkut suliartorami, tillinniarfigitissimalluni paasivaa. Pinnersarnermut atortut nioqqutissallu arlallit tillinneqarsimapput.
- Ajorluinnarpoq. Iseqqaarama tillinniartoqarsimaneranik malunnartoqanngilaq tukannani. Tillinniartulli ilisimalluinnarsimavaat suut tigussanerlugit. Kukilerinermut qimeriaasalersuinermullu atortorisakka, nioqqutissarpassuillu tillinneqarsimapput, pinnersartittarfimmik piginnittoq Ulla Lynge Heilmann Sermitsiaq.AG-mut oqaluttuarpoq.
Kalaallit Nunaata Politiivini pigaartut aqutsisuata, Palle Augustinussenip, uppernarsarpaa Nuukullammi suliffeqarfiutilimmut arfininngornerup ullaassaani tillinniartoqarsimasoq. Tillinniartoqarsimanera politiinut arfininngornermi nal. 10.10 nalunaarutigineqarpoq.
- Tillinniartut igalaakkut isersimapput nioqqutissallu arlallit tillillugit. Suliami suli pasisaqanngilagut, suliarli politiit paasiniaaffigaat, Palle Augustinussen Sermitsiaq.AG-mut ilisimatitsivoq.
Paasissutissanik peqartoq akilerneqassaaq
Ulla Lynge Heilmann suliffeqarfiutiminik annertusaalluni ukiuni sisamani kingullerni sulingaatsiarsimavoq. Taanna Facebookikkut ilisimatitsivoq tillinniarnermut tunngatillugu paasissutissanik, suliamik naammassinninnissamut ingerlatitsisinnaasoq, 3.000 koruuninik akilerneqarumaartoq.
- Naluara suliffeqarfiutima ingerlateqqeriarnissaa qanoq issanersoq. Nioqqutissat tillinneqartut aatsaat tikittoorutigeqqammerpakka, tikisitseqqinnissarlu akisullunilu piffissartornassaaq. Neriuppunga suliaq naammassineqapallassasoq, Ulla Lynge Heilmann oqarpoq.
Kukilerinermut qimeriaasalersuinermullu atortut atussagaanni ilisimasaqarfigilluarnissai ilinniarsimasuunissarlu pingaaruteqartut taanna oqarpoq. Atortut qanoq atornissai ilisimanagit atussagaanni nukik isilluunniit eqqai ajoquserneqarsinnaapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...