Pinnersaatit kakiornernit isumassarsiorfiusut

Pinnersaatit issittumi tamani inuit kakiornerinit isumassarsiorfiusimasunik iluseqartut, Københavnimi Kalaallit Illuutaanni qanittukkut saqqummiunneqaqqammerput.

Amikkut akiorneqarusunngikkaanni, kisianni kakiornerit ilusaannik takutitserusukkaanni, una periarfissaq annernanngilaq.

Pinnersaasiat assigiinngitsunik arfinilinnik assammiortaqartut aamma pingasunik tajartaqartut, kalaallimit kuultinik saffiuutut ilinniartumit Nadja Arnaaraq Kreutzmannimi, kuultinik saffiuumi Nikolai Appelimi Københavnimi ilinniartumit ilusilersugaapput.

Pinnersaatit aallaqqaammut sølvinik rhodiumimik qernertumik qallikkanik suliarineqarput, kisainni aamma sterling sølvitalinnik peqassaaq. Assammiutit rubininik nunatsinneersunit kusassaaserneqarput, tajanilu aamma tallimanik arfinilinnik rubineqarpoq, apeqqutaalluni suliat pinnersaasiat sorliunersut.

Pinnersaatit Kalaallit Nunaanni niuertunut arlalinnut nassiussorneqarput, tamatumalu saniatigut nittartakkami www.panikpanik.com-imi pisiarineqarsinnaassapput, qanittukkullu pisiassaalernissaat naatsorsuutigineqarluni.

Pinnersaasiat kusanartut siulliit tunisassiarineqarnerini ulapputigineqarput, taakku nungungajassimapput, kisianni maanna nutaat suliarineqarput.

Iluanaarutit 10 procentii aamma inuit kakiornerinut tunngasunut atuakkiamut, kalaallimit kakiuisartumit, Maya Sialuk Jacobsenimit suliarineqartumut tunniunneqassapput.

Nadjap aamma ilusilersukkat assersuusiorfigai:

Qulleq

Qulleq KobberInuit, Netsilik, Iglulik, Nunatsiavut aamma kalaallit kitaamiut atortarsimavaat. Taanna tuinut, talinut aamma assannut kakiorneqartarsimavoq. Qulleq qaamanermut aamma kiammut aarnuaavoq.

Ivaluit

Inuit kakiuisarneranni Ivaluit siammasinnerpaapput. Taakku titarneeqqat Canadami aamma Kalaallit Nunaanni tamani takusarpagut.

Ivaluit assaqquni, assanni, inussani, uppatini aamma Kitaani kanaani kakiorneqartarput. Taanna ullumikkut allaat niviarsiaqqanut ateritinneqartarpoq. Mersornermut aarnuaavoq. Ujalussiaq atisanik, toqqinik, qaannanik umianillu atatitsisoq. Ujalussiaq immap uumasuisa imaluunniit uumasut nunamiittut pissaaneranik nukinganillu peqartoq.

Tuukkat

Tuukkat KobberInuit, Netsilik, Iglulik aamma kalaallit kitaamiut atortarsimavaat. Nalunngilarput Thulekulturimi Nunatta kangiata avannaani atorneqartarsimasut, kisianni tunumiut titartagaat allanngorsimasut.

Arnaq assamini, talimini, uppatimini aamma tuimini tuukkanik kakiorneqartarpoq. Piniarluni iluatsitsinissamut aarnuaavoq, tamannalu arnat nunaqarfiup ataatsimut atugarissaarnissaannut aarnuaqartarnerannut uppernarsaataalluarpoq.

Putu

Putu toorniupput, pingaarnertut Tunumi atorneqartarlutik. Kitaani aamma ilaatigut Canadap qeqqani minnerusumik atortarpaat.

Tunumi talikkut, kanaakkut aamma iviangikkut kakiortoqartarpoq. Kitaani aamma Canadap qeqqani inuit putu assaminni, taliminni, tuiminni, iviangiminni, talluminni, ulussaminni qaaminnilu atortarpaat.

Putu katsorsaataavoq aamma pitsaaliuisuulluni. Putu anersaap silarsuaata aamma inuit silarsuaata akornanni ataqatigiissaarisuuvoq.

Powered by Labrador CMS