Skip to main content

Piniutaarsiutit eqqagassarpassuillu katersorneqarput

Piniutaarsiutinik nissiiniarneq sumiiffinnilu assigiinngitsuni saliineq Ilulissani Aalisartut Piniartullu Peqatigiiffiata, IAPP-p suliffeqarfiit assigiinngitsut suleqatiginerisigut iluatsilluarpaat. Angallatit pingasut snescooterillu marluk saliinermi attartorneqarput.

Ningittakkat, qassutit eqqagassallu tipingaartut Ilulissat eqqaani, Saqqatsinni aamma Ilulissat kangiani immami nunamilu katersorneqarput. Immami nunamilu qalluineq katersuinerlu piviusunngorsinnaasimavoq suliffeqarfiit assigiinngitsut peqatigiiffiullu aningaasaliinerisigut. Angallatimmi pingasut snescooterillu marluk saliinermi attartorneqarput. 

Aalisartut Piniartullu Peqatigiiffiata IAPP-p saliinermi aaqqissuisuuvoq aningaasaleeqataasuullunilu. Piniutaarsiutinik nissiiniaanerup saniatigut Ilulissat kangiani illuaqqat sisamat eqqaani iluinilu eqqagassanik katersisoqarpoq. Peqatigiiffiullu innuttaasut illuaqqameereeraangamik eqqagassat angerlaatarnissaat kaammattuutigaat. 

- Maluginiarparput illuaqqat silataanni assut eqqagassaqartoq. Tamannalu ajorluinnarmat kaammattuerusuppugut eqqagassat illuaqqani maleruagassat malillugit eqqagassat illoqarfimmut oqqunneqartassasut, IAPP-mi siulittaasoq Aabili Lange oqarpoq.  

Saliisoqaqqissaaq

Kangiani saliineq siulleq apriilimi IAPP-p aaqqissoqqaarpaa. Piniutaarsiutinillu nissiiniaaneq juunip 11-ani 12-anilu ingerlanneqarluni. Peqatigiiffiullu Torsukattap kangerluani nunaqarfiup Qeqertap eqqaani nissiiniarpoq.

- Suliaq suli naammassinngilaq, piffissami tulliuttumi Torsukattak imaatingut nissiiniaaffingineqarnissaa umiatsialiviillu unnuiffingineqartartut illuaqqat eqqaai salinneqarnissaat tullinnguupput, Aabili Lange oqarpoq. 

Halibut Greenland ApS, Royal Greenland A/S, Polar Seafood A/S, Aalisa ApS aamma Avannaata Kommunia aningaasaleeqataarnerannut peqatigiiffik qujassuteqarpoq. Annertunerusumillu saliisoqassappat peqatigiiffik amerlanerusunik aningaasaliisoqarnissaa kissaatigaat.

- Aningaasaliinissamut neriorsuisut, aningaasaliinissamullu aperinikuusat aamma tapeeqataasuuppata suli qasujaalluta nissitassat qaqissinnaassagaluarpagut. IAPP neriuuteqarpoq tamanna ataavartumik pisartussatut susassaqartuniit aningaasaateqarfinniillu taperserneqarsiinnaalerumaartoq, IAPP allappoq nangillunilu,

- Aqutsiveqarfinni allani aaqqissuisoqassappat IAPP aningaasaleeqataanissaminut, taavalu ilisimasanik siunnersuisinnaalluni aallartisaaqataanissamut piareersimavoq. 

IAPP-mi siulittaasup Aabili Lange-p aningaaserisorlu Haansi Ortu Sandgreen saliinissamut aaqqissuisuupput. Naalakkersuisut avatangiisinut nersornaasiuttagaanut angutit taakkua inuusuttut 2020-mi pissarsiaraat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER