Piniartutut inuuneq ulorianartorsiortinneqartoq pillugu assinik saqqummersitsineq
Assiliisartup Henrik Saxgrenip assilisai, 'Ultima Thule', Sophienholmimi Lyngbymiittumi saqqummersinneqartut maanna takuniarneqarsinnaapput.
Kalaallit Nunaata avannarpasinnerpaavani piniartutut inuuneq silap pissusaata allanngoriartorneranit inuiaqatigiillu ineriartornerannit ulorianartorsiortinneqarpoq.
Assiliisartutut ilisimaneqarluartoq Henrik Saxgren 2014-imi aallartilluni Avanersuarmi piniartutut inuuneq uppernarsarniarlugu assiliisalerpoq, avanersuarmullu arfineq-marloriarluni tikeraarsimalluni, tassa katillugit qaammatini arfinilinni avanersuarmiissimavoq.
Ilaatigut piniartut peqatigalugit sikumiittarsimavoq, piniartullu ulluinnarni inuunerat peqqarnissinnaasoq assilisarlugu.
- Torrallalluinakkat
Ukiut pingasut matuma siorna assilisani 'Ultima Thule' nersornaatisiffigilluakkani saqqummersippai.
- Assiliisartoq atuakkiortorlu Henrik Saxgren Ultima Thule pillugu atuakkiamini torralataalluinnartumi ukiuni tuusintilikkaani piniartutut inuunerup, nunarsuarmiut pinngortitamik ataqqinninngivillutik atuisarnerannit ulorianartorsiortinneqartoq mianersornerpaamik takutitassiariaa, Josef 'Tuusi' Motzfeldt AG-kkut nalunaaruteqarluni allappoq.
Kulturip suli atuunnerani uppernarsaasiortoq
Assit atuakkameersut maanna Købenahavnip eqqaaniittumi Lyngbymi Sophenholmimi saqqummersinneqarput.
- Piniartutut inuunerup suli atuunnerani uppernarsarnissaa uannut pngaaruteqarpoq. Imaassinnaavoq piniartuni kinguaariaat kingulliit massakkut atuuttut, Henrik Saxgren atuakkap saqqummersinneqarneranut atatillugu Sermitsiaq.AG-mut oqarpoq.
Saqqummersitsineq Nûkaka Coster-Waldaumik aamma Minik Rosingimit peqataaffigineqartoq arfininngormat ammarneqarpoq. Apriilip 19-iata tungaanut takuniarneqarsinnaapput.