Piniartut timmisartumit Challengerimit petroliunnattut
Piniartut arfinillit Upernaviup avannaatungaani sapaatip-akunneri marluk missaanni sikkussaaqqapput. Qiiagaluarlutik sikkussaaqqaffimminnit angerlaanneqarnissartik kissaatiginngilaat.
Piniartut umiatsiaararsortut arfinillit Upernavimmit kilometerinik 40-t missaannik avannarpasitsigisumi sapaatip-akunnerini marlunni sikkussaaqqapput. KNR taama allaaserisaqarpoq.
Marlunngormallu petroliumik nunguutsigamik aatsaat politiit attaveqarfigaat.
Politiillu Issittumi Sakkutooqarfik attaveqarfigaat, piniartullu ulorinartorsiuleqqunagit aaneqarnissaannik neqeroorfigineqarput - piniartulli tamatumunnga qujaannarput. Petroliumilliu uunnassaatissamik pajoqqupput.
Challengeri ikiuussinnaasoq
Taamaammat sakkutuut timmisartuat Challengeri, avannaanut timmisartuussinissaminik pilersaaruteqareersoq, ippassaq Upernaviliartinneqarpoq piniartullu petroliumik nakkartitsivigineqarput.
Issittumilu Sakkutooqarfiup ilimatitsissutigaa nakkartitsineq iluatsilluartoq piniartullu sikuernissaata tungaanut uunnassaaatissaqalerput.
Piniartut politiinit Issittumilu Sakkutooqarfimmit qanimut malittarineqarput, iridium-radiukkullu attaveqarfigineqarput.
Piniartut arfinillit nunamit 15 kilometerisut ungasissusillip missaanniipput. Maniilarsuit avissaarpata taakku ingerlaqqissinnaanngussapput.